Xhaka-a'n Saudi a pan dawn

Bayer Leverkusen midfielder Granit Xhaka chuan AC Milan leh Fenerbahce sawmna hnarin, sum tamna lam Saudi Arabia a pan dawn a, khawthlang media-te chuan Saudi Arabian club Neom nen an inrem tawh niin an sawi.

Neom hian Swiss midfielder manah hian euro maktaduai ruk an pe dawn nia sawi a ni a, Neom-ah hian Xhaka hian kum khatah €10mtd a hlawh phak dawn - kum 32 mi a nih ve tawh avangin a hlawh tamna tur lam a hawi ve ṭan niin a lang.

Xhaka hian an ram club FC Basel aṭanga a hming chher ṭanin, Borussia Mönchengladbach-ah season li a khel a, season sarih zet Arsenal tan a khel bawk. Kum 2023 khan Leverkusen a pan a, Xabi Alonso enkawlna hnuaiah Bundesliga leh DFB-Pokal nomawi a chawi.

Leverkusen tan match 99 khelin goal ruk a khung a, assist vawi kua a nei. Arsenal tana a khelh laiin FA Cup-ah vawi hnih a champion a, Basel tan Swiss Super League-ah vawi hnih a champion tawh bawk.