Big Six an inpuahchah ṭan

August 15, Zirtawpni zan aṭangin Premier League khelh a ni leh tawh dawn a, match hmasa berah champion lai Liverpool chuan Bournemouth an mikhual ang.

Reds hian hemi hma hian competitive match khelh tur an nei a, August 10, Pathianni zanah FA Cup champion Crystal Palace nen FA Community Shield-ah an intawng dawn.

English football season ṭan a hnaih tawh avangin EPL club-ten training ṭanin, pre-season match an khel ṭan leh tawh hlawm a, Big Six zingah pawh Liverpool, Arsenal, Manchester United leh Tottenham Hotspur ten tun thlaah pre-season an ṭan dawn.

Arsenal hian August 17, Ningani zanah season an ṭan dawn a, Old Trafford-ah Manchester United an lenchilh ang - Red Devils tan pawh season thar atana an match hmasa ber tur a ni ang.

Tottenham Hotspur erawhin EPL hmain inkhel pawimawh khelh tur an nei a, Europa League champion hian UEFA Super Cup-ah Champions League nomawi chawitu Paris Saint-Germain an hmachhawn dawn a, August 13, Nilaini zanah an inkhel dawn.

Coach thar Thomas Frank enkawlna hnuaia khel tur Spurs hian August 16, Inrinni zanah EPL season an ṭan dawn a, kai thar Burnley an mikhual ang.

Club World Cup champion Chelsea leh CWC khel ve tho Manchester City-te erawh USA-a tournament hautak an khelh avangin an chawl hahdam dawn a, August-ah an pre-season match an khel chauh dawn.

Blues leh City hian match pawh an khel tam hman tawh dawn lo a, Chelsea hian match hnih khelin, City phei chuan match khat chiah season ṭan hmain an khel tawh ang.

August 17, Pathianni zanah Chelsea-in EPL-a an match hmasa ber an khel dawn a, Crystal Palace an mikhual dawn. City-in August 16 zanah an match hmasa ber an khel dawn a, Wolverhampton Wanderers an lenchilh dawn.