Germany-ah pawh Marquez bawk a chak

Pathianni zan khan MotoGP German Grand Prix tlan a ni a, season hmang ṭha tak mai Marc Marquez chuan hnehna chang lehin rider championship lama hma a hruaina chu point 83 tehmeuhin a sawhnghet ta.

Spanish rider Marquez hian Inrinni khan Sprint Race-ah hnehna a lo chang tawh bawk a, tun ṭumah hian ni dang ang bawkin a nau Alex Marquez nen an inum na hle a, mahse a tawpah chuan tawnhriat nei ṭha zawk a chungnung.

Bike intlansiakna sang berah Marquez hi a vawi 200 nan a inlan a, a tan chuan thil thar a ni tawh lo. Sachsenring tlankawngah bik a vawi kua nan hnehna a chang a, tun hnai ram hrang hranga intlansiakna paliah a chak vek bawk.

Kum 32 mi Marquez chuan, "Tun hnaiah a zawna vawi thum ka chak avangin Sachsenring-ah pawh a tir aṭang khan beisei ka nei sang hle a, kan duh leh beisei angin thil a thleng bawk," tiin a sawi a, Marquez unau bakah Francesco Bagnaia chu pathumnaah a thleng thung.

Boruak danglam tak a thleng thut a nih ngawt loh chuan Marquez hi a champion a rinawm a, midang tan beisei bo tawp erawh a la ni bik lo. Tunkar tawp hian Brno-ah Czech Republic Grand Prix an tlan leh dawn a ni.