Arsenal-in Mosquera la dawn

Valencia centre back Cristhian Mosquera chuan Arsenal a zawm dawn a, mimal thilah Gunners nen hian an inrem tawh - he thuziak i chhiar meuh chuan an inla lut fel tawh hial mai thei.

Arsenal hian tlarhnung laia khel turin centre back ṭha William Saliba leh Gabriel Magalhaes an nei sa a, mahse, Mikel Arteta-a'n defender pahnih elpui tur, kum naupang a duh a, kum 21 mi Mosquera an la lut dawn ta.

Spain Under-21 international Mosquera hian centre back leh right back-ah a khel kawp thei a, defender Takehiro Tomiyasu-a'n Emirates Stadium a chhuahsan avangin defender lakluh hi Arsenal tan a ṭul hrim hrim bawk.

Valencia academy chhuak Mosquera hian Valencia tan match 90 khelin goal khat a khungsak a, season hman zawh takah khan player pawimawh niin, league match 38-a 37-ah a inkhel tluan vek.

Arsenal hi nipui transfer-ah an che na hle. Mosquera hma hian Real Socidead midfielder Martin Zubimendi, Brentford captain Christian Norgaard leh Chelsea keeper Kepa Arrizabalaga te an la lut tawh a, Sporting Lisbon striker Viktor Gyokeres an la lut hnai bawk.