Cole Palmer a thiam ber

FIFA Club World Cup-ah PSG an langsar a, Champions League champion hi thil danglam a thleng a nih loh chuan nomawi chawi tura ngaih an ni. Hemi a nih avang hian Golden Ball dawng tur pawh PSG player Achraf Hakimi, Vitinha, Desire Doue, Khvicha Kvaratskhelia leh Ousmane Dembele te zinga tu emaw ber ni tura ngaih ni mah se thil danglam a thleng ta tlat.

PSG star rual aiin Cole Palmer a langsar ta zawk a, New Jersey (29.4°C) lum ṭha viau mah se Palmer erawh a 'cool' hle. English midfielder hian goal ṭha bik ṭum hnih a khung hnuah Joao Pedro khung tur a siamsak a, final-ah man of the match-a thlan niin inelna pumpuiah best player a thlan a ni.

Chelsea-in Europa Conference League final-a Real Betis 4-1 a an sawp ṭumin Palmer hi man of the match-ah thlan a ni tawh bawk. Chelsea chakpuitu Palmer chuan, "Final hi nuam ka ti. Tun ṭum phei chu a hma ai mah khan a nuam zawk. A chhan chu mi tam takin min ring lo a, khatiang kara theihtawp va chhuah kha a nuam ka ti. Game plan ṭha tak kan nei a, kan tum ang kan tihlawhtling," tiin a sawi.

Palmer-a'n danglamna a thlen a, English midfielder hi goal hmaah a hriam miau avangin a langsar a, a goal khung lawm dan pawh football ngaina chin chuan an hre vek tawh ang.