Santi Cazorla : Kawng bumboh aṭanga ropuina ram chu

Kum 40 mi Santi Cazorla chuan Real Oviedo-ah season khat atan contract pawt seiin season tharah La Liga-ah a inlan dawn. Arsenal midfielder hlui Cazorla contract neih lai hi tun nipuiah tawp tur a ni a, Inrinni khan season khat atan a pawtsei.

Ovieda leh Cazorla chanchina thil ropui chu Spanish club hian kum 24 hnuah Spain rama football inelna sang ber La Liga an khel dawn a, a kaipuitu Cazorla hi Oviedo-a inzir chhuak a ni. An chanchin thu ziak thiam bika thawnthu ngaihnawm tak an ziak ang mai a ni a, a taka thil thleng atan chuan a awihawm loh hial zawk.

Oviedo ṭantu

Santiago Cazorla González hi December 13, 1984 khan Llanera, Asturias-ah a piang a, an khaw club Real Oviedo ṭantu a ni. A chhungte leh an chhevela chengte pawh Oviedo ṭantu vek an ni a, football ngainatna hmun aṭanga sei lian tan chuan Carbayones (Oviedo sawina) a ṭan hi a tih awm tak a ni zawk.

Kum riat a nihin Oviedo a zawm a, kum 16 a nihin a club ṭan chu La Liga aṭangin an relegate a, first team tan a khel hman lo. Sum lamah Oviedo an buai a, chhiatna lian tak tawkin 2002–03 season tawpah phei chuan fourth division (Tercera Division)-ah an tla thla hial.

Cazorla pawh kum 18 a tlin hma thla ruk a la awmin loh theih loin Villarreal a zawm a, reserve team aṭanga bul ṭanin kum tam lamah chuan senior team tan a inlan tawh.

Football zinkawng

Footballer langsar ṭhahnem takte hi khawvel hriat an hlawh hmain harsatna an tawk hnem ṭhin hle. Cazorla pawh hi 5ft 6in chauha sang a ni a, a tan club liana khelh nghal a harsa. Kum 2006 nipui khan Recreativo de Huelva chu €600,000-in a zawm a, kum li daih contract ziak mah se €1.2 mtd-a Villarreal-in an lei let theihna a awm.

Cazorla hian Recreativo Huelva-ah a theihna a lantir nghal a, season khatah match 34 khelin goal nga a khung. Villarreal-in Cazorla theihna an hmu a, an la let lehnghal. Yellow Submarine-ah Cazorla-a'n hming a chher chho a, season li chhungin match 30 chuang a khel deuh ziah.

Malaga-in sum an hmang tam a, kum 2011 nipuiah Cazorla hi €21mtd-in an lalut. Bul ṭannaah pawh freekick aṭangin mawi zetin a khung nghal a, season khat chauh a khel tihin Arsenal-in an lei chhuak nghal. Arsene Wenger-a'n Cazorla hi London club-ah £10mtd-in a lalut a, Spanish midfielder hma hian German forward Lukas Podolski leh French striker Olivier Giroud te an lalut tawh bawk.

Cazorla hi match hmasa berah Sunderland hmachhawnin man of the match-ah an thlang nghal a, Anfield-ah Arsenal tana a goal hmasa ber Liverpool lakah a khung. Arsenal ṭantute mit a tlung chho hle.

Natna khirh tak chu

Arsenal-in 'Invincibles' hnua team ṭha leh ber tur an din chhoah an inngai a, Cazorla chuan midfield-ah hmun pawimawh a chang chho. Mahse, October 2016-ah Cazorla chu a ke (achilles) a hliam a, inhliam satliahah an ngai. An rin an ngawt erawh a ni lo, natna khirh bik a tawk.

Ke rek inhliam anga ngaih chu an beisei ang maiin a dam thei lo a, ṭum 11 zet zai an tawk. An zai an ṭhuina lai chu natna hrikin a rawn ei zel avangin doctor-te rilru pawh a tibuai a, a ke tan hial an tum hman. Football chawlhsan thei dinhmunah a ding a, inkhel chu sawi loh, damchhunga rualbanlo thei dinhmunah a ding.

Arsenal pawhin theihna sang bik player an chan a, Cazorla hmalam hun a thim. Mahse, kum hnih dawn a chawlh hnuah Villarreal kawr hain a rawn let. Spanish midfielder rawn let hian mak tih pawh hlawh. Natna khirh tak laka dam chhuak tih a hriat lo a, a thiam ngaiin a la thiam reng. Yellow Submarine tana a match hmasa berah a thiam thil rawn lantirin lehin 'standing ovation' an pe hial.

Cazorla, i dam ta!

Cazorla hrechiangtute chuan a dam leh hi an lawmpui a, Arsenal tan khel tawh lo mah se a chanchin hriain Gunners ṭantute pawh an lawm. Chutihrualin Villarreal ṭantute an lawm ta ber a, transfer fee pawh ngai miah loin player talent nei ṭha bik an lalut.

Football chawlhsan mai tum tawh khan Spain jersey te a rawn ha ṭha leh a, a chanchin chu ngaihnawm a tling. Villarreal tan season hnih khelin league-ah match 35 ve ve a khel a, 2019–20 season-ah phei chuan league-ah goal 11 a khung tling hial.

Kum 2020 nipuiah Al Sadd zawmin a khelhpui ṭhin Xavi hnuaiah a khel a, Qatari club-ah pawh hian a hlawhtling viau. Season hnih chhungin nomawi paruk a chawipui a, heta ṭang hian a inzir chhuahna club Oviedo a pan.

Mumang ram chu

Kum 2023 khan a bul ṭanna Real Oviedo zawmin kum khat contract a ziak a, a duh danah phei chuan hlawh nei loa khelh a duh a, hei hian club a hmangaihzia a lantir. Mahse, 'employment rules' vangin hlawh neih loa khelh erawh a lo thei lo a, a tlem thei ang ber hlawhlin season khatah €91,000 a hlawh a, India pawisa chuan nuai 91.34 a la ni pha tho.

A kawr hralhna 10% chu club academy lamah a lut bawk a, a inkhelh hma hauhin hming a chher hle. Season khatanaah goal a khung lo a, Segunda División (La Liga 2) ah parukna niin promotion playoff-ah Espanyol an hneh lo.

Tun season hman zawh takah erawh Cazorla hian duhthusama ṭhain season a khar a, mumang ram ang mai a ni. Oviedo hian pathumna niin season an khar a, promotion playoff semifinal-ah Almería chu aggregate-ah 3-2 in an hneh. Second leg-ah Cazorla hian goal khungin final an thlen theih nan goal hi a pawimawh hle.

Final pawh hi double leg-a khelh a ni a, Miranda de Ebro-ah Mirandes-in Oviedo hi 1-0 in an hneh. Second leg hi Oviedo-in an mual Estadio Carlos Tartiere an khel a, mi sing thum lenna stadium-ah entu 29,624 an awm.

Mirandes hian Panichelli hmangin an khung hmasa a, first leg nen 2-0 in hma an hruai. Oviedo beiseina a chau a, hun harsa an tawh lai takin Cazorla-a'n penalty aṭangin siphurh a sut ṭhen. Mualneitu an phur chho a, hun pangngaiah Chaira hmangin siphurh an sut zo a, extra time khelh niin Portillo goal hmangin an chak . Aggregate-ah Oviedo 3-2 in an chak a, Cazorla-a'n a football career-a a hun tawn ropui bera ngaih theih a tawng a, a chanchin hian football khawvel a deng chhuak hneh hle.