Wimbledon khelh leh tum Djokovic
Novak Djokovic chuan engtik niah emaw chuan Wimbledon khelh leh ngei a la tum tih a sawi. Serbian star hian Jannik Sinner a hneh loh avangin kuminah final a lut zo ta lo, semifinal-ah a zinkawng a tawp.
Nizan khan world number 1 Sinner leh Carlos Alcaraz ten Wimbledon final an khel zui a, result erawh kan hre hman lo. Tunlai player ṭha bik pahnih an ni a, anni pahnih tho hi ropui taka French Open final khel tawhte kha an ni.
Grand Slam vawi 24 champion tawh Djokovic erawhin Wimbledon title lak tam lamah Roger Federer a la tluk thei dawn rih lo, Swiss star hi vawi riat champion tawhin Novak hian vawi khatin a phak lo.
Kum 38 mi Djokovic chuan, "A nihna takah chuan tun hnai kum khat leh a chanve chhung vel chu ka tan hian a harsa ve hle, kum tam tawh lamah hliam neuh neuh ka nei fo, ṭha taka khelh reng a harsa.
"Ka theih anga ṭha leh nasa in taksa ka ekawl dawn a, a theih a nih phawt chuan Wimbledon hi vawi khat tal chu khelh leh ka la duh. Ka dam ṭhat a, ka fit bawk chuan ṭha takin tennis ka la khel thei tih ka hria," tiin a sawi.
Serbian star chuan sawi zawmin, "Kumina Grand Slam ka khelh apiang mai hi ka tana a hnuhnung ber a ni zel thei tawh tih ka hria. Chutihrualin ka elpuite hi Sinner leh Alcaraz te an ni a, hah thei lo ang maia khel thei an ni mek.
"Tun ṭum hi Centre Court bika ka match hnuhnung ber a nih loh hram ka beisei. Wimbledon ka khelh tawpna tur ang chuan ka la suangtuah duh lo," tiin grass court inelna lian chu khelh leh ngei a la tum ruh hle.
Djokovic hian nomawi dang chawi belh tawh miah lo pawh ni se a ropuina a nep chuang lo ang, a bik takin major title lak tam lamah amah hnaih bertu Rafael Nadal aiin a champion tam - Nadal hi a chawlh tawh avangin amah hnaihtu an awm lo.
Tuna mipa player la inkhel zingah chuan Alcaraz hi Grand Slam champion tam niin, vawi nga a champion tawh - nizanah a lak belh chuan parukna a ni ang. Spanish star leh Djokovic te inkar a la hla vang vang hle a, theihna nei sang mah se Alcaraz hian Djokovic te huanga awm tur chuan hun rei tak inkhel thei turin hriselna a mamawh tel dawn a ni.