Sunderland an insum lo!

Premier Leqague 2016-17 season hnua, a vawi khart nan English top flight league khel tura lo kir Sunderland-in tih mai mai an tum lo - tun nipuia an player lakluh parukna ni turin Brighton & Hove Albion winger Simon Adingra an la lut.

Black Cats hian kum 23 mi forward manah hian pound maktaduai 21 an theh chhuak a, a khelh ṭhat dan a zira a man hi pek belh theih tur niin, kum nga chhung atan contract a ziak.

Ivory Coast interna-tional Adingra hian Danish Superliga club Nordsjælland aṭanga a professional zinkawng zawh ṭanin, season hnih a khelhsak hman a, kum 2022 khan Brighton a zawm.

English club hian Belgian club Union SG-ah loan-in an khelhtir zui a, kum 2023-ah Brighton tan a khel ṭan. Brighton tan hian season hnih chhungin match 73 a khel a, goal 12 khungin, assist vawi nga a nei.

Adingra chuan, "Sunderland ka zawm thei hi ka lawm a, inkhelh ka châk tawh hle. Club leh a hmachhawpten min tiphur a, club nen kan inbiaknaa min duh ve tak tak nia ka hriatna chuan inbiak a tinuamin, in club hma huna tel ve hi min châktir a ni.

"Premier League khelh hi ka naupan lai aṭanga ka châk ṭhin a nih avangin ka chhunzawm thei tur hi ka lawm a, chona hautakin min hmuak mek a ni. Team ṭha leh top player te kan hmachhawn dawn a, mahse, ka inpeih tawh a ni," a ti.

Sunderland hian Adingra hma hian midfielder Noah Sadiki (Royale Union Saint-Gilloise, £15mtd), Enzo le Fee (AS Roma, £19.3mtd), Habib Diarra (Strasbourg, £30mtd), full back Reinildo (Atletico Madrid, free transfer) leh winger Chemsdine Talbi (Club Brugge, £20.5mtd) te an la lut tawh bawk.