Number 1 Sabalenka a tla

A chak loh hnuah Aryna Sabalenka chuan chanchinbu mite a hmachhawn a, hmanni deuh lawka a thusawi avanga an unzui chiamna ang kha a thleng nawn dawn tawh lo tih a sawi lang nghal.

French Open aṭanga a tlak hnu lawkah Sabalenka hian a khingpui Coco Gauff chu a khelh ṭhat vang pawh ni loin, amah zawkin tihsual a ngah vangin Gauff a champion pha niin a sawi, a hnuah a thusawi avang hian dem a hlawh a, ngaihdam a dil zui bawk.

Wimbledon semifinal-ah Sabalenka hian player langsar lo leh ṭha lo zawka ngaih a ngam lo a, chanchinbu mi ṭhenkhat chuan, "I khel ṭha em?" tiin an zawt nghal. Belarus star chuan, "Ka ṭawng sual chang ran ang kha in awm a nih chuan min chhuahsan thei ang," tiin a sawi fiamthu hmasa phawt.

Sabalenka chuan, "Roland Garros press conference ang kha chu in hmu tawh lo ang, a chhan chu tihsual ka neih ka siamṭha tawh. Amanda Anisimova kha a fingin ka chak lohna lai a hre chiang a, chutah tak chuan min bei.

"Tun hma pawhin mi ṭhatna lai leh keima ṭhat tawk lohna lai ka sawi fo a, chanchinbu ṭhenkhat hi chuan ṭawng sual leh mawi lo lai an chang ve ṭhin bawk," a ti a, a khingpui Amanda Anisimova chu final ṭha taka khel turin duhsakna a hlan bawk.

Sabalenka hi player ṭha tak ni mah se a vanduai ve ṭhin bawk, a bik takin Grand Slam-ah chetsual a ching. Australian Open leh French Open final-ah rinkai leh buk rit tak ni mah se Madison Keys leh Gauff a ngam lo, tunah erawh final a lut phak ta lo.

Kum 27 mi Sabalenka chuan, "Thil engkim hi kan duh leh beisei ang vekin a thleng dik thei lo, chutiang hunah chuan awrawl chhuah meuha han au chang te kan nei a, ṭhenkhat chuan racquet vuak chhiat leh tharum thawh mai duh hial te pawh an awm.

"Kei ngei pawh ka thinrim avangin ka insum zo lo fo a, hetiang hunah tak hian rilru fim leh dawhthei taka awm thiam a pawimawh, Thinrimna hian rah ṭha a chhuah ngai lo, kei ngei pawh hian tun thlengin zir tur ka la nei," tiin a sawi.

Sabalenka hian Wimbledon semifinal vawi thum a khel tawh, a chak lo zawkah a la ṭang vek. Belarusian star chuan, "Tun dinhmunah chuan Wimbledon hi ka ngaina lo, sawi vak dan tur pawh ka hre lo zawk hial, chak loh hlimah chuan sawi a harsa.

"Mahse, engtik niah emaw chuan Wimbledon hi ka la ngaina ang, ka chet fuh lohna boruak ṭha lo hi ka la thai bo ngei ang a, huatna hi ngainatna in ka la thlak ngei ang," tiin a sawi a, tunah erawh chuan US Open lam a ngaihtuah a ngai rih ang.