
Man United-in French rawlthar la lut
Manchester United chuan forward Enzo Kana-Biyik an la lut a, French rawlthar hi Ligue 1 club Le Havre a chhuahsan chiah avangin lakna manah sum an seng lo. Chutihrualin English club hian French club hi zângnadawmna an pe thung ang.
Man United hian kum 18 mi Enzo Kana-Biyik hi loan hmangin Swiss Super League side Lausanne-Sport-ah an chhuahtir lehnghal dawn. Lausanne-Sport hi season liam ta khan Swiss League-ah pangana a ni a, Man United neitu INEOS club tho a ni.
Kana-Biyik hian season liam ta khan Ligue 1 Under 19-ah Havre U19 tan match 16 a khel a, goal kua khungin assist vawi khat a nei. Kumin March thla khan France Under 18 tan a khel ṭan a, match sarih a inlan tawh bawk.