Roma-in Evan Ferguson an rim

Serie A club AS Roma chuan Brighton & Hove Albion aṭangin Evan Ferguson chu loan-a lakluh tumin an hel mek a, Italian club hian an hlawhtlin ngei an inbeisei.

Republic of Ireland international Ferguson hi rawlthar beiseiawm tak a ni ṭhin a, August 2021 khan Brighton tan a match hmasa ber a khel. September 2, 2023 khan Newcastle United lakah Brighton chu 3-1 a chakpuiin, hattrick a siam.

Magpies laka hattrick a siam hian kum 18 lek ni chunga EPL-a hattrick siam thei Michael Owen, Robbie Fowler leh Chris Bart-Williams te kiangah a hming a ziak kai a, beisei ang erawh a ni zui lo.

Brighton-in pound maktaduai 100 hial an chhiar hman striker hian season hman zawh takah khan Brighton tan match 15 chiah khelin goal khat a khung a, West Ham-ah loan-a kal zuiin, match riatah goal a khung lo - tunah Roma an lam ri ta.

Hetihrual hian Ferguson hi kum 20 chauh a la nih avangin insiamṭha turin hun a la ngah a, Roma hi a tan insiamtharna tur a ni thei.

Serie A club hian an centre forward Tammy Abraham chu Besiktas-ah season khat chhung loan-a khel turin an chhuah a, a hmun ruak luah turin Ferguson an duh.