Hendo-a'n Ajax a chhuahsan

Liverpool captain hlui Jordan Henderson chuan nakkum World Cup mitthla chungin Ajax a chhuahsan a, Hendo hian Premier League club-ah kir a tum niin an sawi.

English midfielder hlui hian January 2024 khan Dutch club hi a zawm a, kum khat leh a chanve atan contract ziakin, kum khat dang pawhsei theih a ni.

Mahse, kum 35 mi midfielder hian a contract hi pawtsei loin, chhuah a thlang ta zawk a, Premier League club bakah European top league aṭangin duhtu a la nei nual nia sawi a ni.

Hendo hian Ajax tan match 57 khel hmanin, goal khat a khung a, assist vawi kua a nei bawk. Dutch club-ah captain dinhmun hial chelhtir a ni a, nomawi chawi a nei lo thung.

Season hman zawh takah khan league nomawi chawi thei dinhmunah an ding hman a, kar nga chauh a awm tawh tihah khan anmahni hnaih bertu PSV Eindhoven aiin point kua ngawtin an sang zawk hman. Mahse, a tawp lamah an tawlhthlu a, PSV an champion daih.

Hendo hian Anfield-a kum 12 hun a hman chhungin Premier League, Champions League, FA Cup, League Cup (2), FIFA Club World Cup, UEFA Super Cup leh Community Shield nomawite a chawi hman a, July 2024 khan Al Ettifaq a zawm.

Mahse, Saudi Pro League-ah thla ruk pawh hmang tling loin a chhuahsan zui a, Ajax a zawm. Three Lions coach thar Thomas Tuchel-a'n England a enkawl hnua squad-ah a la tel zel a, World Cup khelh hram tumin league sang zawkah khelh zui a tum.

Hendo hian ram tan match 83 khelin goal thum a khung a, assist vawi 11 a nei. Euro 2024 squad-ah khan a tel phak lo a, kum 2023 hnua ram tana a inlan loh vang vang hnuin, kumin kumtir khan Albania leh Latvia lakah inlanin, bench aṭanga luhtir a ni.