Sunderland-ah winger thar Talbi

Premier League kai thar Sunderland chuan winger Chemsdine Talbi chu Club Brugge aṭangin an la lut a, pound maktaduai 20.5 thlenga a man sang chho thei turin Belgian club nen an inrem.

Black Cats hian £18mtd chu Talbi manah hian an pe phawt ang a, a khelh ṭhat dan a zirin £2.5mtd an pek belh leh ang. Kum 20 mi winger hian kum nga chhung atan contract a ziak a, Stadium of Light-ah kum 2029 thleng a khel dawn tihna a ni.

Belgium-a piang, age level-a Belgium tana inlan, tun hnua Morroco international ni ta Talbi chuan, "Khawvela league lian bera ka khelh theih dawn avangin Black Cats hi ka tan hnar a harsa.

"Premier League ka khel tur hi ka phur hle a, Sunderland hmachhawpin min tiphur hle bawk. Team ṭha tak, player naupang tak tak awmna an ni a, chu chuan Sunderland pan hi min tichâk hle bawk," a ti.

Talbi hi Club Brugge academy chhuak niin, season hman zawh takah khan regular takin senior team tan a khel ve chiah a, inelna hrang hrangah match 44 khela goal sarih khungin, assist vawi nga a nei.

Black Cats hian Talbi hi tun nipuia player panga an lakna chiah a ni a, a hma hian midfielder Noah Sadiki (Royale Union Saint-Gilloise, £15mtd), Enzo le Fee (AS Roma, £19.3mtd), Habib Diarra (Strasbourg, £30mtd) leh Reinildo (Atletico Madrid, free transfer) te an la lut tawh a, EPL-ah a tikimtu mai nih an tum lo.