Barry -a'n Everton-a zawm

Premier League club ho an bazar chhunzawm zel a, Everton chuan Villarreal aṭangin striker Thierno Barry chu pound maktaduai 27-in an la lut a, June 2029 thleng an hnena khel turin contract an ziahpui.

France Under-21 striker hi a contract-ah chuan £34.5mtd-a leichhuah theihna dan a inziak a, mahse, English club hian Yellow Submarine-in an phal zatna aia hniam fein an lei chhuak.

Kum 22 mi striker hian season hman zawh takah khan Villarreal tan match 38 khelin goal 11 a khung a, assist vawi li a nei bawk. La Liga-ah pangana nihpuiin, season thara Champions League khel turin a hruai kai.

Tunah erawh chona thar hmachhawn turin a puanthuah a tel a, EPL lam a pan. Barry chuan, "Ka hlim takzet a, he hmun pan hi thil phurawm tak a ni.

"Everton hi Premier League club lian tak an ni a, player ṭha tak tak, Wayne Rooney leh Romelu Lukaku te pawh an lo khelh tawhna club an ni a, ka naupan lai chuan anmahni ang nih ve hi ka duh ṭhin - an sulhnu chhui a, an tih ang tihve ka duh a ni," a ti a, a phur hle.

Thierno Barry hian French club Sochaux B aṭanga a zinkawng zawh ṭanin, Belgian club Beveren leh Swiss club ṭha FC Basel tan pawh a khel tawh a, August 2024 khan Villarreal hi £13mtd-in a zawm a, tunah chuan Premier League a khel dawn ta.