Spurs-in Kudus an la dawn

Tottenham Hotspur chuan West Ham aṭangin midfielder Mohammed Kudus chu pound maktaduai 55-in an la lut dawn a, Ghana international manah hian Hammers nen an inrem tawh.

Kum 24 mi Kudus hian Spurs-ah hian medical a nei ang a, contract a ziak zui ang - he thuziak i chhiar meuh chuan an in la lut fel tawh hial mai thei.

Spurs hian kar hmasa khan Kudus lakluh tumin Hammers hi an lo dawr tawh a, mahse, an dawrna hmasa hi £50mtd niin, West Ham hian an lo hnar.

Thomas Frank enkawlna hnuaia indinthar mek team hian £5mtd-a tisangin West Ham an dawr leh a, an dawrna hi pawm a ni ta a ni. Kudus hi Premier League club langsar dang paruk velin an thlithlai ve tho nia sawi a ni a, amah berin Spurs-a kal a duh avangin a kal dawn ta.

Kudus hi August 2023 khan Ajax aṭangin Hammers hi £35.6mtd-in a zawm a, £2.5mtd pek belh theih dan a tel. David Moyes enkawlna hnuaiah match 48 khelin goal 18 a khung nghal a, assist vawi 10 a nei bawk.

Mahse, season hman zawh takah erawh match 35-ah goal nga khungin, assist vawi li a nei hram. Kudus hian release clause, EPL club tan bik £85mtd a nei a, a aia hniam fein Spurs hian an lei dawn tihna a ni.

Europa League champion hian Brentford forward Yoane Wissa an thlithlai mek bawk a, Thomas Frank-a'n a player hlui hi London lama seng luh ngei a tum.