Bayern-in Xavi Simons an ngaihven

Bayern Munich chuan RB Leipzig midfielder Xavi Simons lak tumin an ngaihven a, Netherlands international hian club thuneitute hnenah chhuah a duh thu a hrilh tawh.

Kum 22 mi Xavi Simons hian kumin January khan PSG aṭangin €50mtd-in a nghetin RB Leipzig hi a zawm chauh a, chutihrualin loan hmangin season khat leh a chanve a khel tawh thung.

Season liam ta khan Xavi Simons hian Bundesliga-ah goal 10 a khung a, RB Leipzig erawh Bundesliga-ah pasarihnaah awmin season tharah European football an khel dawn lo.

Bayern leh Leipzig te hi la indawr lo mah se Xavi Simons hi chuan chona thar hmachhawn a duh tih a lantir tawh. Bavarians hian Xavi Simons hi FIFA Club World Cup-a inhliam Jamal Musiala hmunruak luahtu tur lam ni loin lakluh an duh hrim hrim vanga ngaih a ni.

Vincent Kompany hote hian an player lak duh ber Florian Wirtz chu Liverpool lakah an chan a, Spain international winger Nico Williams pawh chhuah aiin Athletic Bilbao-a contract ziah belh a thlang zawk.

Bayern hian Liverpool winger Luis Diaz pawh an dawr a, English club hian Colombian winger hi chhuahtir tumna an nei lo. Simons hi an la thei a nih erawh chuan midfield leh winger-ah a khel thei a, position pahniha a khelh theihna hi squad tih chhan nan a pawimawh ang.