Swiatek-i a harh thar

Iga Swiatek hian kum 2018 khan hmeichhe naupang inelna huangah Wimbledon title a lo la tawh, a hnu lamah erawh grass court inelna lianah hian a la champion leh lo; hmun dangah champion tam mah se All England Club-ah hlawhtlin a harsat.

Polish nula hian Nilaini zan khan Court-ah Liudmila Samsonova a hmachhawn a, darkar khat leh minute 49 chhungin 6-2, 7-5 in hnehna a chang, nizan khan Belinda Bencic nen final luh inchuhin an inkhel zui a, result erawh kan hre hman lo thung. Semifinal lehlamah world number 1 Aryna Sabalenka leh Amanda Anisimova te an inhmachhawn bawk.

Swiatek hian Grand Slam nomawi panga a la tawh, chung zingah chuan Wimbledon nomawi a la tel lo - French Open title pali leh US Open nomawi pakhat a ni a, atan grass court inelna hi inkhelh nawmna hmun a ni lem lo.

Kuminah hian a champion emaw, champion lo emaw pawh ni se Swiatek hian Wimbledon a thlen san ber ṭum a tawng a, theih ni se la chuan a vawi ruk nan major title lak ngei a tum ang, kawng awlsam erawh a ni dawn bik lo thung.