
Alcaraz tan match hnih chak a la ngai
Wimbledon vawi khat champion nih pawh a harsa - Carlos Alcaraz hi a zawna vawi hnih champion mek a ni a, kumiah pawh champion leh turin kawng dik a zawh, zanin hian Centre Court-ah Taylor Fritz nen semifinal an khel ang.
Open Era chinah player pathum chiahin Wimbledon title hi a zawnin vawi thum an la thei. Bjorn Borg (1976-80), Pete Sampras (1993-95, 1997-2000) leh Roger Federer (2003-07) te an ni, an huanga lut turin Alcaraz hian vawi hnih chak a la mamawh.
Kum 22 mi Alcaraz chuan, "Wimbledon semifinal ka khel leh thei tur hi ka lawm hle. Tournament ka khelh tirh aṭang khan a sang thei ang ber thlen ka tum a, chumi tur chuan kawng dik ka zawh ve leh mek zel a ni, ka chak zel bakah ka khelh dan avangin ka lawm.
"A nihna takah chuan mi te hian record hrang hrang an sawi a, zawhna pawh ka dawng hnem. Hei erawh ka ngaihtuah leh ngaih pawimawh ber a ni hran lo, ni khat atan chuan match khat ngaihtuah a tawk, chumi hnuah thil dang chu a lo kal leh ang," a ti.
A kum la tam lo mah se Alcaraz hi a puitling tawh hle, a bik takin inelna sang leh boruak lian a ngam. Hmanni lawk khan French Open nomawi a chawi tawh a, tunah All England Club-ah champion leh thei dinhmunah a ding mek.
Nikum khan Alcaraz hian French Open leh Wimbledon nomawi a la kawp tawh a, Open Era chinah Bjorn Borg-a chauh French Open leh Wimbledon title a kum zawna la thei a la ni, tunah Alcaraz hi chutiang ti thei dinhmunah chuan a ding mek a ni.
Spanish star Alcaraz chuan, "Fritz nen kan inkhel dawn, ani hi player ṭha leh khauh tak a ni. Tun hnaiah a hlawhtling hle bawk a, a bik takin grass court hi inkhelh nuam a tihna hmun a nih bawk avangin match hautak tak khel tura ka inpeih a ngai," a ti.
Alcaraz leh Fritz te hi tun hmain vawi hnih an intawng tawh, hengah hian Alcaraz a chak ve ve avangin tun ṭumah pawh hian rinkai a ni ang. Mahse, Fritz hian service a nei ṭha hle, a ball vuak na tak hi grass-ah chuan a kal chak zual dawn atan hmanraw ṭha tak a ni ang.
World number 2 Alcaraz chuan, "Wimbledon match 19 ka chak zawn tawh a, ka chak tluang lai hi tih tawp mai ka duh lo," tiin a sawi. Grass bikah Alcaraz hian match 37 a khel tawh a, vawi thum chak chak loh a nei, atan hmun ṭha bik a ni.