US president Trump-a'n final en dawn

US president Donald Trump chuan FIFA Club World Cup final a en tur thu a tichiang tawh a, inelnain ngaihven a hlawh leh sawt dawn. Final hi July 13, Pathianni zan dar 12:30-ah khelh a ni dawn a, Chelsea hian Real Madrid leh PSG inkhela chak zawk an hmachhawn ang.

MetLife Stadium, New Jersey-a Trump-a'n final a en tur thu hi FIFA chuan an tichiang tawh. FIFA president Gianni Infantino chuan, "Sorkar leh President hnen aṭangin Club World Cup leh nakkuma neih tur FIFA World Cup atan thlawpna ṭha tak kan hmu. FIFA hi khawvel pum huap a ni a, khawvel pum huap a nih chuan kil tinah kan awm tur a ni a, New York-ah pawh kan awm a ngai," tiin New York-a Trump Tower-ah office a hawn thu a puang.

Trump hian kar liam ta khan Afghanistan, Myanmar, Chad, Congo-Brazzaville, Equatorial Guinea, Eritrea, Haiti, Iran, Libya, Somalia, Sudan leh Yemen aṭanga US tlawh a khuakhirh a, US President hi dan loa pem lut (immigration) lakah khawng viau mah se FIFA President chuan US-in lawm takin football fan-te World Cup en tura a pawm tur thu a sawi bawk.