FIFA Club World Cup: Joao Pedro-a'n Chelsea final a thlenpui

FIFA Club World Cup 2025 semifinal-ah Chelsea-in Joao Pedro goal hnih hmangin Fluminense 2-0 in an hneh a, final an lut. London club hian July 13, Pathianni zan hian nizana Real Madrid leh Paris Saint-Germain inkhel chak zawk nen nomawi an inchuh ang.

Brazilian forward Pedro hian kar liam ta khan Blues a zawm ve chauh a, £60mtd man striker hian Palmeiras lakah ṭha taka khel tawh bawkin hun rei lote chhungin a club thar tan final a khel der dawn. Chelsea-in hun rei tak chhung an zawn tawh striker chu Pedro ngei hi a ni thei a, a ni ta lo a nih pawhin goal pawimawh a khung avang hian a man a phu, tiin a sawi theih.

Thiago Silva a chesual

MetLife Stadium, East Rutherford-ah entu 70,556 an pungkhawm a, entu hi ṭhahnem viau mah se quarterfinal-a Real Madrid leh Borussia Dortmund inkhel entu 76,611 erawh an pha lo. Final pawh MetLife Stadium-ah bawk khelh a ni ang a, Chelsea hian Real Madrid emaw PSG emaw an hmachhawn dawn avangin tun inelnaa entu tam ber ṭum a ni thei ang.

Inkhelh ṭan hmaa hming langsar ber chu Thiago Silva a ni a, Brazilian defender hi Fluminense captain a nih bakah Chelsea tana khel tawh a nih avangin ngaihven a hlawh. Mahse, inkhelah erawh Thiago Silva a chesual a, Joao Pedro a langsar ta thung.

Minute 18-naah vei lam aṭangin Neto-a'n a la lut a, cross ball ṭha dah lut lo mah se Thiago Silva-a'n hmun himah clear loin, Pedro zawnah chiah a kal. Pedro hian pet tura a insiamrem hnuah goal kilah tak a hlai lut a, goal ṭha bik a nih miau avangin keeper Fabio tan pawh dan theih a ni lo. Chelsea tana a goal hmasa ber a ni.

Chelsea an vannei

Blues hian Malo Gusto hmangin goal khung belhna remchang an nei a, French right back hian goalkeeper zawnah chiah ball a tauh. Fluminense lamin ṭha zetin Chelsea tlarhnung an rawn ṭhiat a, Hércules-a'n goalkeeper Robert Sánchez dan hman loin goal-ah pet mah se goalline aṭangin Marc Cucurella-a'n a pet chhuak.

Fluminense-in an nawr na zel a, Thiago dos Santos ball tauhin Trevoh Chalobah kut a per a, referee Francois Letexier-a'n Chelsea penalty pe. VAR rawn inrawlhin, referee hian mual sira 'monitor' hmangin thil thlen dan a en nawn a, penalty thutlukna hi mak tak maiin a sut.

Pedro goal ropui

Second half-ah Chelsea-in bul an ṭan ṭha zawk a, Cucurella-a'n box pawn aṭangin a khung teuh hle. Brazilian club pawhin substitute Everaldo Stum hmangin keeper Sanchez hna an rawn siam bawk.

London club dinhmun ṭhaa an din theih nan Pedro bawk a langsar. Blues-in counter attack hmangin an vaw let a, Pedro hian mual vei lamah ball changin box chhungah la lutin kawh zetin crossbar pet perin goal-ah a pet lut a, minute 56-naah 2-0 a ni. Brazilian forward hian a inzirchhuahna club lakah a goal khung a lawm duh lo.

Goal hnih an khung hnuah Chelsea-in hahdam takin an khel thei a, Christopher Nkunku ball pet chu goalline aṭangin Thiago Silva-a'n a pet chhuak. Fluminense-in an nawr thei lo a, Chelsea erawhin goal khung belhna remchang an la nei. Nicholas Jackson-a'n box chhung aṭangin goal zawnah a pet lo a, Chelsea erawh 2-0 in an chak tho.