Vannei takin Sinner a tlang

Infiamna hian hlimna leh lawmna a thlen ṭhin, chutih karah chuan hmel lehlam a nei ve tho - a chak lo leh vanduaina tawktu lam tan chuan lungngaihna leh ṭahna thlentu a ni ve thei bawk - Grigor Dimitrov tan pawh Wimbledon chu mangchhia a ni ta.

Russian star Grigor Dimitrov hian Jannik Sinner lakah set hnih faiin hma a hruai mek a, set thumnaah pawh 2-2 a ni mek - mahse, vanduaithlak takin Dimitrov chu a ban hliam vanga enkawl lailawk a ni a, a khel zui thei tawh lo.

Kum 34 mi Dimitrov hian 6-3, 7-5, 2-2 a hma a hruaina chu a chhunzawm thei tlat lo. Grand Slam a khelh hnuhnung panga ngawt chu hliam vang hian a khel tluan thei lo a, a tan chuan inelna lian hi mangchhia a ni rih.

World number 1 Sinner chuan, "Quarterfinal khel turin a tlang zawk chu ka ni ngei mai a, mahse kan inkhelah khan a chak zawk chu ka ni lo. Tun hnaiah Dimitrov hi a vanduai thei hle, hliam vanga a khel tluan thei lo lai hmuh kha a hrehawm.

"Ka ṭhian ṭha tak a ni a, player taima leh thawkrim berte zing mi a ni bawk. A rang thei ang bera dam leh turin duhsakna ka hlan, tennis court-ah a hmel hmuh leh ngei pawh ka beisei," tiin a sawi a, tlang zawk ni mah se a inchhuang lo hle.

Italian tlangval Sinner hian a match lehpekah chuan Ben Shelton a tum dawn. Seeded 10-na Shelton hian inkhel dangah Brandon Nakashima chu 3-6, 6-1, 7-6(1), 7-5 a hnehin a vawi khat nan Wimbledon quarterfinal a lut ve bawk a ni.

Kum 22 mi Shelton chuan, "Ka match hmasa lamah tie break ka khel nasa, chuvangin a hautak bik ṭhin. Tun ṭumah khan tie break khelh loh duh viau mah ila vawi khat chu ka khel tho a, duh ang vekin thil a kal thei ṭhin bik lo a ni," a ti.

American star Shelton hian hnehna chang turin darkar thum leh minute nga chhung hun a hmang a, inkhel rei tak chu a ni lo. A hmabak chu Sinner a ni dawn a, tournament an khelh chhoh dan thlir chuan semifinal lut turin beisei a nei sang ngam ang.