A chawr chhuahnaah Di María a kir

Angel Di María chuan Rosario Central a zawm fel leh ta - Argentine club tan hian tun hmain a lo khel tawh ṭhin, kum 18 mi a nihin a chhuahsan a, kum 37 mi a nih hnuah a kir leh tihna a ni.

Di Maria hian an rama kir leh hi a duh ṭhin, mahse amah leh a chhungte thlengin thaha vauna a tawk ṭhin a, hei vang hian a duh ang hunah pawh a kir mai lo, tunah erawh a tan hun ṭha a in herchhuak ve leh ta a ni.

Argentina tana World Cup leh Copa America nomawi chawi tawh Di Maria chuan, "Central tan ka inkhel ve leh thei dawn ta, hun rei tak hnuah kan ramah ngei football ka khel leh dawn bawk, hetiang baka chanchin lawmawm dang hi a tam bik chuang lo ang," a ti.

Di Maria hi player ṭha bik zinga mi a ni a, a vanglai chuan European club lian hrang hrang - Real Madrid, Manchester United, Paris Saint Germain, Juventus leh Benfica tan te a khel tawh ṭhin.