Iga Swiatek tak tak kan hmu!

Theihna a nei sang a, a kal fuh lo laklawh mai a ni - Iga Swiatek chuan a zia tak tak a chhuah leh ta. Wimbledon khelh laiah Swiatek hian Clara Tauson sawp chungin quarterfinal a invaw kai.

Thawhṭanni zan khan Court 1-ag Swiatek hi a inlan a, darkar khat leh minute nga chhung lekin Tauson hi 6-4, 6-1 in a hneh a, grass court inelna lian berah hian a vawi hnih nan last 16 a paltlang, a hmabak chu Liudmila Samsonova niin zaninah an intawng leh nghal ang.

Swiatek kan hmu

Chawlhkar 125 chhung world number 1 a ni thei a, hmeichhe player zingah number 1 nih rei theih lama pasarihna a ni phak hial - kum 24 mi chauh ni chunga a sulhnu a nep lo hle, tun hnaiah erawh a khelh fuh hleihtheih loh avangin sawi a hlawh.

Season hmasa chawhnu lam khan thla khat chhung hrem a ni a, a hnu lamah inkhel pangngai leh tawh mah se a la ropui leh thei lo. Wimbledon atan bik phei chuan rinkai zingah a tel meuh lo, mahse mipui rin phak bakin a khel ṭha mek.

Grand Slam vawi nga champion tawh Swiatek chuan, "A tir lamah khan tihsual ka ngah angreng hle a, ka tuar hman teuh hle bawk. A hnu lama inkhel ka thunun thei erawh a lawmawm. Kan inkhelh lai khan Clara kha a nuam lo deuh niin ka hria.

"A hma zan khan a khua a sik tih a sawi a, a tan chuan a tuka match khelh nghal kha a hautak hle ang tih ka ring," tiin a khingpui chungchang a sawi zui a, dam ṭha ni se la chuan hmachhawn a harsat zual ngei a rin thu a sawi tel bawk.

Polish nula Swiatek hian Wimbledon 2025 bikah Polina Kudermetova, Caty McNally, Danielle Collins leh Tauson te a hneh tawh, match li a khelh aṭangin set khat chiah a la hloh avangin a khel ṭha tluang hle tih a chiang.

Inkhel dang

Wimbledon inkhel dangah seeded pasarihna Mirra Andreeva chuan Emma Navarro chu 6-2, 6-3 in a hneh a, grass court inelna linah hian a vawi khat nan quarterfinal a lut a, zaninah Belinda Bencic nen semifinal lut tur zawk an chingfel leh dawn a ni.

Andreeva hi kum 18 mi chauh a la ni a, Wimbledon 2005 hnu lamah quarterfinal lut leh thei naupang ber a ni hial. Maria Sharapova kha kum 18 leh ni 62 mi ni chungin a thiam zual pariat zingah a lo inhlangkai tawh, tunah a sulhnu a rawn zui ta chiah.

Tleirawl ṭangduang tak Andreeva chuan, "Ka service min chhuhsak thei dinhmuna a din lai te khan ka hlauthawng lek lek ṭhin, mahni ka infuih mawlh mawlh reng a, point khat lek hi ka dinhmun tidanglam daih thei a nihzia kha ka hrechiang hle," tiin a sawi.

Inkhel dangah Belinda Bencic chuan Ekaterina Alexandrova chu 7-6(4), 6-4 in a lo hneh ve thung a, hnehna chang tur hian darkar khat leh minute 57 chhung hun a hmang a, a vawi khat nan Wimbledon quarterfinal a invaw kai a ni.

Kum 28 mi Bencic hian nikum April thla khan fanu Bella a hring a, a hnuah tennis khel chhunzawm lehin tun ṭum hi fa a neih hnuah Grand Slam last 16 a paltlang lehna hmasa ber a ni a, thawnthu ngaihnawm a ziah lai hi tawpsan mai a duh lo ang.