Barca-ah Szczesny a cham dawn

Football a chawlhsan hnua Barcelona tana inkhel tura lo kir Wojciech Szczesny a tui laklawh a, Polish goalkeeper hian Catalan club-a a contract chu kum hnih dang atan a pawtsei.

Kum 35 mi keeper hian August 2024 khan Juventus aṭangin inkhelh a chawlhsan a, mahse, thla hnih hnuah Barca sawmna pawmin, inkhel turin a lo kir.

Barca hi an first choice keeper Marc-Andre ter Stegen chu nikum khan season khat tawp inlan thei lo turin a inhliam a, hetiang boruak harsa karah hian Szczesny chu an club-a khel turin an thlem lut thei a ni.

Catalan club tana La Liga leh Copa del Rey nomawi chawitu Szczesny chuan, "Rin loh takin Barcelona ka pan a, season duhawm tak ka hman avangin lawmman atan contract thar pek ka ni," a ti a, a hun hman danah a lungawi hle.

Hetihrual hian Szczesny-a'n a thlak tak Ter Stegen hma hun a chiang lo sawt. German keeper hian September 2024 khan a khupah hliam neiin, season tawp dawnah a lo kir thei hram.

Ter Stegen awm loh chhungin Szczesny a lo che ṭha bawk si a, Polish keeper hi first choice a nih chhunzawm mai ang em aw, tih chu zawhna awm mek a ni.

Barca hian Espanyol aṭangin goalkeeper Joan Garcia chu thawm nei hatin an la lut bawk a, Ter Stegen bakah keeper ṭha pangngai tak, kum 26 mi Inaki Pena an la nei bawk - inṭhuahfai ngei chu an ngai tih a lang a, Szczesny leh Ter Stegen ten second choice nih chu an duh lo ve ve ang.

Szczesny hi Arsenal academy aṭanga graduate niin, Gunners hi kum 16 lek a nih laiin a zawm. Gunners tan match 181 ngawt a khel hman a, Brentford leh AS Roma-ah te loan-in a khel bawk.

Kum 2017 khan Juventus zawmin, kum 2024 thleng a khel a, Serie A leh Coppa Italia-ah vawi thum ve ve nomawi a chawipui hman. Juve aṭangin inkhelh a chawlhsan zet a, tunah erawh Barca tan a khelh chhunzawm zel dawn - Poland tan match 84-ah si ban a nghak thei.