AC Milan-a khel tur Luka Modric

Real Madrid legend Luka Modric chuan season tharah AC Milan a zawm dawn a, Croatia captain hian kum 39 tling tawh mah se, sum tamna lam hawi mai loin, European football-a top flight league-ah a khelh chhunzawm zel dawn.

AC Milan manager thar Massimiliano Allegri chuan Modric an lakluh tur thu hi press conference a hmachhawn hmasak berah a sawi a, "Modric-a'n August-ah squad a rawn zawm ang, player danglam bik a ni," a ti.

Modric hi Club World Cup-ah Real tan a fehchhuak mek a, match ngaah bench aṭanga lutin, Madrid khaw club hian semifinal an lut tawh - zanin dar 12:30-ah Paris St-Germain nen an inkhel ang.

Sum aiah hmingṭhatna

Modric hian kum 2012 khan Tottenham Hotspur aṭangin Real hi a zawm a, club dang tan a khel leh tawh lo. Season kal mekah bench aṭangin a lut tlangpui a, heti chung hian European top flight league khel tlakah a inngai.

Croatia captain hian kum khat atan Serie A club-ah hian contract a ziak phawt a, season khatah euro maktaduai 3.5 a hlawh ang a, a khelh ṭhat dan a zir leh club chet ṭhat dan a zirin bonus a awm dawn bawk.

Kum 2018-a Ballon d'Or dawngtu Modric hian duh ni se, Milan-a a kum khat hlawh tur aia tam hlawh theihna tam tak a nei - a tawpah erawh European top five league-a club langsar tana khelh a thlang ta zawk.

Milan beiseina

Allegri hian 2010-14 inkar kha AC Milan hi a lo enkawl tawh a, kum 2011 khan Serie A a champion pui - Juventus lamah a luhsan a, Serie A ringawtah pawh vawi nga ngawt a champion.

Mahse, tunah Milan-ah a kir leh ta. Milan hian midfielder Tijjani Reijnders chu Manchester City hnenah an hralh tawh a, left-back Theo Hernandez chu Al Hilal zawm mai thei dinhmunah a ding a, goalkeeper Mike Maignan leh forward Rafael Leao hma hun a chiang lo bawk.

Mahse, Allegri chuan, "Reijnders leh Hernandez te kan hnenah an awm tawh dawn lo a, Maignan leh Leao erawh an cham a rinawm," a ti - Maignan hi Chelsea-in an dawr a, mahse, Milan-in £25mtd tal an beisei avangin an inrem thei lo.