Wimbledon: Federer-a hmuh laiin Djokovic a chak

Wimbledon champion tam ber, vawin riat ngawt mai champion tawh Roger Federer-a'n Thawhṭanni zan khan Royal Box aṭangin inkhel a en a, a mit hmuh lai ngeiin nomawi chawi tam lama amah hnaih bertu Novak Djokovic chuan hnehna a chang.

Centre Court-a inkhelah, darkar thum leh minute 19 chhungin Djokovic hian Alex de Minaur chu 1-6, 6-4, 6-4, 6-4 in a hneh a, a vawi 16 nan Wimbledon quarterfinal a lut, zaninah Flavio Cobolli nen semifinal lut tur zawk an chingfel leh dawn a ni.

Grass court inelna lian berah hian Djokovic hi vawi sarih a champion tawh, champion tam ber Federer-a record tluk turin vawi khat champion a la hmabak, kumin hi atan hun ṭha a nih a beiseina pawh a lian hle.

Grand Slam vawi 24 champion tawh Djokovic chuan, "Roger Federer-a'an ka inkhel lai a hmunah min en tih ka hria, ka inkhel a en hnuhnung pahnihah a chak lo zawk ka ni a, tunah erawh ka chak ta - thil ṭha lo kha a ṭha lam zawngin ka thlak.

"De Minaur kha player ṭha tak a ni, set khatnaah khan ka service vawi thum ngawt min chhuhsak. Set hnihna kha chu ka fimkhur takzet a, service humhim kha ka thupui a ni, ka tih hlawhtlin theih avangin ka chak hram," tiin a sawi.

Federer chungchang zawhna chhangin Djokovic chuan, "Roger hi Wimbledon nen an inzawm tlat a, mite ngaihsan leh kei pawhin ka chung en tak a ni. Hun rei tak chhung chu kan lo inel tawh ṭhin, tunah ka tournament ngainat takah ka inkhel lai a rawn en hi ka lawm," tiin a sawi.

Tun ṭumah hian a champion a nih chuan Wimbledon title lak tam lamah Federer a nih rual dawn a, major title lak tam lam Margaret Court-i (24 titles) nen record inṭawm an nih chu a kalsan chiah bawk a, hmabak erawh a la hautak dawn.

Serbian star hian season hmasa khan Grand Slam nomawi a chawi miah lo - Carlos Alcaraz leh Jannik Sinner ten vanglai an hmang ve mek avangin kuminah pawh champion a awlsam dawn lo, final thlen hmain Sinner nen an inhmachhawn thei dawn a ni.

Thawhṭanni zan inkhel dangah Flavio Cobolli chuan Marin Cilic chu 6-4, 6-4, 6-7 (4), 7-6 (3) in a lo hneh ve bawk. Cilic hi kum 36 mi a ni tawh a, tun hmain Wimbledon final a khelh tawh bakah US Open nomawi a chawi tawh a, tunah erawh a vanglai a liam ve ta tih a lang.