ISL-in Indian footballer te a pui lo - Stimac

India national team coach hlui Igor Stimac chuan Indian Super League-in Indian player-te a puih loh thu a sawi chhuak. Nikum khan All Indian Football Federation (AIFF) chuan Stimac hi an ban a, a aiah Manolo Marquez la lutin a thlaktu pawh hi Nilaini khan a bang.

Croatian coach Stimac chuan, "AIFF kal dan a dik lo a, tum mumal tak an nei lo. ISL vang hian player-ten hma an sawn phah lo. A chhan chu ISL match a ṭha tawk lo a, player-ten result vangin pressure an nei tawk lo bawk. Relegation a awm lo a, quality a awm lo," tiin na takin AIFF kalphung a sawisel.

India hi kum 2023 khan FIFA ranking-ah 102-na a ni a, kuminah erawh 127-ah an tla tawh. Stimac chuan sawi chhunzawmin, "Ram inkhel a awmin inbuatsaihna hun ṭha a awm lo a, team ṭha hmachhawn turin inbuatsaihnain min daih lo. Hemi vang tak hian AIFF pawhin ISL calendar hi national team milin a her rem a ṭul," tiin a sawi a, club lama player hlawh sang lutuk chu a sawisel bawk.