Weightlifting ti mi an zawng

Mizoram Weightlifting Association chuan 'Weightlifting Talent Hunt' an nei mek a, naupang theihna nei mi zawn chhuah hi Olympic Vision 2036 hnuaia kalpui niin, a thawh khatnaah hian Saitual leh Serchhip district an fang.

Naupang ṭha bik zawn hna hi July 1-4 chhung neih a ni dawn a, zawn hna thawk tute hi hmun thumah inṭhenhrangin - Group 1 ten Sihfa Govt. Middle School leh Keifang Presbyterian English School (PES) bakah Saitual Govt. Middle School an tlawh.

Group 2 ten Phullenah an ti tawh a, Phuaibuang leh Khawlianah te an chhunzawm ang. Group 3 chuan Thenzawl PES, Chawngbuangi Memorial School (Serchhip) leh Serchhip PES bakah Good Will Academy (Serchhip) te an tlawh thung a ni.

Naupang an thlan chhuah te chu - MSSC Weightlifting Academy Ramhlun Sports Complex; Khelo India State Centre of Excellence ( KISCE), RG Stadium leh Sports Authority of India (SAI), Mission Vengthlang ah te an dah dawn a ni.