Hneh nei lo Alexander Zverev

Beisei loh thil kan hmu chhunzawm zel - Alexander Zverev chu hneh nei miah loin Wimbledon 2025 aṭangin a tla ve leh ta. German tlangval tan grass court mangchhia chu a la reh thei ta chuang lo a ni.

Zverev a chak loh lai hian Novak Djokovic leh Jannik Sinner te erawh an chak a, anni pahnih hi chuan harsatna lian tham lutuk tawk loin second round an inhlangkai thung.

Zverev a tla

Player ṭha pangngai tak ni mah se Zverev tan Grand Slam a harsa ṭhin, a bik takin Wimbledon khelh hi a harsat ṭhin. Arthur Rinderknech nen darkar li leh minute 40 an inkhelh hnuah 7-6(3), 6-7(8), 6-3, 6-7(5), 6-4 in a chak lo.

Seeded pathumna Zverev chuan, "Hetiang em em a hrilhhai leh ruak hian ka la awm ngai lo. Tennis court chhungah ka khel ṭha lo a, a pawn lamah ka boruak a sang chuang lo bawk, ka hun tawn aṭanga thawh chhuah ka ngai," tiin a sawi.

Zverev hma hian mipa player langsar dang - Lorenzo Musetti, Holger Rune leh Daniil Medvedev te bakah seeded chang phak Francisco Cerundolo, Ugo Humbert, Alexei Popyrin, Stefanos Tsitsipas leh Denis Shapovalov te chu chak ni hmel hmu loin an tla nghal bawk.

Djokovic a chak

Result danglam tak tak a thlen karah Novak Djokovic erawh a dingnghet. Vawi sarih champion tawh hian fiahna chu a hmachhawn ve tho a, mahse Alexandre Muller chu 6-1, 6-7(7), 6-2, 6-2 a hnehin second round a lut.

Grand Slam vawi 24 champion tawh Djokovic hian inelna neih ṭan hma kha, atan chuan tun ṭum hi major title lak belh theihna remchang a nih tur thu a lo sawi tawh, match hmasa bera set a hloh avang erawh chuan inenfiah a ngai dawn.

Kum 38 mi Djokovic chuan, "A nihna takah chuan tih fuh tawk loh lai ka nei nual tih ka hria, chumi vanga beidawng chi erawh ka ni lo," a ti. Second round-ah chuan tualchhung player dan Evans a hmachhawn leh dawn a ni.

Sinner a nghet

World number 1 a ni bawk a, a khel pawh a nghet ṭha hle - Jannik Sinner chuan darkar khat leh minute 48 chhung lekin Luca Nardi chu 6-4, 6-3, 6-0 a sawp chungin first round a paltlang.

Italian tlangval Sinner hian hremna a hman zawh hnuah pawh a khel ṭha thei hle. French Open khelh zawh takah pawh final a lut a, chak lo zawkah a ṭang thung. Tun ṭumah pawh hian champion tura rinkai bik zinga mi a ni.

Seeded pakhatna Sinner chuan, "Tournament tin mai hian thawnthu hran a nei vek. Wimbledon pawh a danglam, chuvangin thui tak ngaihtuah loin match hmabak pakhat atan zel ka inbuatsaih dawn," a ti. Zaninah Aleksandar Vukic nen an inkhel leh ang.