Liverpool-in Nyoni an chelh

Premier League champion Liverpool chuan an rawlthar ṭhangduang, midfielder Trey Nyoni an chelh a, Anfield-ah season rei zawk cham turin contract thar a ziak.

Kum 18 mi Nyoni contract rei zawng hi 'hun rei zawk atan' tih bakin chiang taka tarlan erawh a ni lo. England Under-20 international hian September 2023 khan Leicester City academy aṭangin Reds academy a zawm.

Nyoni chuan, "Ka naupan tet aṭanga ka club ṭan em em tana contract thar ka ziak thei hian min tilawm hle. Tunah chuan he contract ka hlawhchhuah theih chhan ka pholan a hun ve ta - kum naupang tê ka la ni a, hmasawnna tur ka la ngah hle. Chutianga hmasawn zel chuan Liverpool min rinna hi rulh let ka duh a ni," a ti.

October 2024 khan a professional contract hmasa ber a ziak a, club academy tan a khelh ṭhat ṭhin avangin, February 2024 khan FA Cup fourth round-a Southampton an hneh ṭumin Reds tana a match hmasa ber a khel.

Liverpool tan FA Cup-a inlan thei naupang ber niin, kum 16 leh ni 243 mi a ni a, January khan PSV Eindhoven nen Champions League-a an inkhelh ṭumin bench aṭanga luhtir a ni a, kum 17 leh ni 213 mi niin, European football-a Liverpool tana inlan thei naupang ber a ni bawk.