Nilaini zingah Ramos vs Bellingham

Real Madrid defender Sergio Ramos-a'n football khelh a la chawlhsan lo a, kum 39 mi niin Mexican club Monterrey tan a la khel reng. Ramos hoin Monterrey hian FIFA Club World Cup-ah last 16 an thleng a; July 2, Nilaini zing dar 6:30 hian Borussia Dortmund an hmachhawn dawn.

Monterrey hi team nem tura ngaih ni mah se tun inelnaah chak loh an la nei miah lo a, match hmasa berah Inter Milan 1-1 in an chelh a, Sergio Ramos-a'n goal a khung. Match hnihnaah River Plate an chelh a, group match hnuhnung berah Urawa Red Diamonds 4-0 a sawpin last 16 an lut.

Mexican club hian knockout stage lut turin goal khat chiah an chhuah a, Dortmund hi team ṭha zawka ngaih ni mah se hna a awlsam dawn lo. German club lamah Jobe Bellingham-a'n hming a chher chho mek a, kum 19 mi hian Dortmund tana bul a ṭan hmasak berah Ulsan HD lakah goal a khung.

Niko Kovac-a kaihhruai Dortmund hi tun inelnaah an la tlawm bik lo a, match thumah vawi hnih clean sheet an nei tawh. German club hian goal nga khung tawhin player hrang vek khung a ni a, goal khungtu bik an nei lo. Nilaini zinga Monterrey nen an inkhelh hunah Bellingham a langsar dawn a, Europe lama tawnhriat nei ṭha Ramos nena an inhmachhawn tur hi a hmuhnawm khawp ang.