Tlawm mah se Messi a ni tlat!

Inter Miami an tlawm a, tam takin Lionel Messi an deu - mahse, Argentine footballer ropui ngainatute tan chuan Messi ropuina a nep phah chuang lo a, an tan chuan Messi chu Messi a la ni reng.

Miami boss Javier Mascherano chuan, "PSG hian season ṭha tak an hmang a, an telna apiangah nomawi an chawi bawk. Mahse, kum 38 a ni tawh chung pawhin, mipuiin man chawia an en châk ber chu Messi a la ni reng tho," a ti.

Inter Miami leh PSG inkhel hi a hmunah fans 65,574 zetin an en a, Club World Cup-ah Messi telna inkhel hian entu a ngah zel.

PSG defender Lucas Beraldo chuan, "Leo hi chu midanglam bik a ni a, ani nena match kan khel ho thei kha chawimawina a ni - Leo inkhel ena seilian ka ni a, ka tan chuan hun danglam bik a ni," a ti - a elpuite pawhin an ngaisang tlat zel hi Messi danglamna chu a ni.

Argentine midfielder hian PSG lakah goal khung lo mah se, chance nei lo tawp a ni lo. French club keeper Gianluigi Donnarumma tan hna a siam zeuh zeuh a, a pass 'cial' lutuk Luis Suarez-a'n a dawng ṭha tawk lote chu uiawm a tling.

Mascherano chuan, "Leo khan a khel chhe lo - second half-ah ball a hmu hnem deuh a, first half-ah erawh PSG press kha a nat em avangin kan tan a harsa a ni," a ti a, a khelhpui ṭhin Messi a fak.

PSG thiampuipa Ousmane Dembélé chuan, "Messi, kan inhmu leh thei chu ka lawm takzet. Khawvela footballer ropui ber i ni a, tun inelna ang hian Inter Miami tan thawnthu thar i ziah zel ka beisei," tiin social media-ah Messi nena an thlalak a pho chhuak.

Club World Cup en theih tura pe chhuaktu DAZN pundit John Mikel Obi chuan, "Messi hi chu player fing bik a ni. A tlan tam lo a, mahse, ball-in a ke a thlen tawh kha chuan a hlauhawm tlat zel - planet hran ami ang mai a ni," a ti a, an mualpho zanah pawh Messi-a'n fak a hlawh tho!