Wimbledon boruak a nuam - Sabalenka

Hmeichhe tennis world number 1 Aryna Sabalenka chuan Wimbledon boruak a nuam tih a sawi a, inelna ṭan hma ang bawkin a tawp thleng chu nuamti taka khelh theih a inbeisei thu a sawi bawk.

Sabalenka hi Belarus mi a ni a, indo buaina vangin Russian leh Belarus infiammi te kan UK luh a harsa ṭhin a, lawm an hlawh lo bawk. Tunah erawh boruak nuam leh zalen tak hnuaiah inelna an hmachhawn thei tawh a ni.

Grand Slam an khelh hnuhnung zawk French Open-ah khan Sabalenka hian final a lut a, mahse nomawi inchuhna inkhelah Coco Gauff a ngam lo, inkhelh zawhah tennis a khelh tawh china a match ṭha lo tak zinga mi a nih thu a sawi hial.

Sabalenka leh Gauff te hi Wimbledon atan an inbuastaih dun a, hlim taka an lam dun lai video chu social media lamah a darh bawk. Sabalenka chuan, "Coco nen hun nuam tak kan hmang dun a, hmanni lawka ka thu sawi avang khan amah ka dah hniam tihna a ni lo.

"Inkhelh hah leh vanduai zawka ṭan lai chuan thu mawi lo deuh lo sawi palh pawh a awl deuh, ka khelh ṭhat loh thu ka sawi a ni mai a, ka khingpui khan champion phu khawpin a khel tih erawh ka hre tel ve bawk.

"Wimbledon erawh a boruak a danglam, inelna ṭan hma aṭangin a boruak a zangkhai em em a, ka tan hun ṭha a nih theih ngei pawh ka beisei," a ti. Kum 2021 leh 2023 khan semifinal a thleng a, chumi aia sang a la thleng lo thung.

Kum 27 mi Sabalenka hian a match hmasa ber atan vawiin tlao dar 5:30 hian Court-ah Carson Branstine a hmachhawn dawn a, a khingpui tur Canadian nula hi world number 321 a nih avangin harsa vak loin a hneh theih mai a rinawm.