Brentford-in Man United dilna an hnawl

Manchester United-in Bryan Mbeumo lak tumin a vawi hnih nan Brentford chu £62.5mtd velin an dawr a, Bees beiseina zat a la ni pha lo - an hnawl.

United hian kum 25 mi Mbeumo lak tumna zat hi £55mtd a ni a, a chet ṭhat a zirin £7.5mtd pek belh an inhuam. Hemi hma hian United hian £45mtd pek a, a che ṭhat dan a zira £10mtd pek inhuamin an dawr tawh bawk.

Nipui bazarah Man United hian Matheus Cunha chu Wolves aṭangin £62.5mtd-in an la lut tawh a, Bees hian Mbeumo manah hetiang zat bawk hi pek tlak nghal an duh niin sawi a awm.

Mbeumo hi Tottenham Hotspur pawhin an duh niin a sawi a awm a, Spurs hian Bees manager Thomas Frank chu an la lut. Cameroonian striker hi Champions League khel tur club pawhin an duh niin sawi a awm bawk.

Kumin kum tawpah Africa Cup of Nations chu Morocco-ah khelh a ni dawn a, Mbeumo pawh hian kar li chhung tal chu season awm turah a khel thei dawn lo. Cameroon hian AFCON match hmasa berah Gabon chu December 24, 2025 hian an hmachhawn dawn.

Mbeumo hian Brentford hi French club Troyes aṭangin kum 2019 khan a zawm a, hetih lai hian Bees hian Championship an la khel. Inelna hrang hrangah match 242 khelhsak tawhin goal 70 a khung a, season hman zawh takah khan goal 20 khungin assist vawi kua a nei a ni.