Inter hmaa ding tur Fluminense

FIFA Club World Cup last 16-ah zanin dar 12:30 hian Inter Milan leh Fluminense te an inkhel dawn a, an inkhelhna tur hmun Bank of America Stadium hi Chelsea-in Benfica an hnehna hmun a ni.

Entu 74,867 zet leng mah se Chelsea leh Benfica inkhelah entu 25,929 an awm pha chauh. Inter leh Fluminense inkhelah pawh stadium a khah zawh chu rinawm lo mah se Brazilian club an inlan dawn avangin entu an tam hret tura a ngaih theih.

Inter hi match hmasa berah Monterrey nen an inhnehtawk a, hemi ṭum hian kum 19 mi Francesco Pio Esposito an chhawr lo. Urawa Reds an hmachhawn ṭumin bench aṭangin an luhtir a, 2-1 in an chak. Match hnuhnung bera River Plate an hneh ṭumah phei chuan bul ṭantirin goal hmahruai a khung a, 2-0 in hnehna an chang.

Tlarhmaah Lautaro Martínez langsar ber mah se club academy chhuak Esposito hi mipui mit fukna tur a ni thei ang. Kum 2023 khan Euro U19 C'ship-ah Italy champion puiin FIFA U-20 World Cup-ah Italy chu panhnihna a nihpui a, loan hmanga a chhuahna Spezia-ah che ṭhain 2023–24 season khan Serie B Footballer of the Year-ah an thlang.