Monaco-ah Pogba a kal ta

Hremna a tawrh zawh hnuah Paul Pogba chuan football zinkawng a zawh leh dawn, kum hnih chhung atan AS Monaco a zawk - Ligue 1 season tharah a hmel kan hmu leh tawh dawn tihna a ni.

France international midfielder Pogba hi damdawi hman phal loh a hmang tih hmuh chhuah a ni a, a tirah chuan kum li chhung atan hrem ni mah se, a hnuah tla 18 atan pawh tawisak a ni leh thung.

Kum 32 mi a ni a, theihna nei sang bik a nih bawk avangin Monaco chuan ṭha taka chawr theih an la inring a, hun rei tak chhung match pangngai khel loa awm tawh a nih avang erawh chuan a chanchin tur sawi lawk a harsa.

Manchester United tan pawha khel tawh Pogba chuan, "Tunah hian inkhel turin ka inpeih leh tawk, ka taksa mai ni loin rilru pawh match khel turin a inpeih tel bawk, ka mamawh chu hun chauh a ni tawh," tiin a sawi.

Tun hnai khan Pogba hian harsatna a tawh lai khan Juventus chuan an hnuchhawn niin a sawi a, inhriatthiam tawnna a inṭhen ni mah se chhuah luih tir niin a ngaih theih. Hremna a hman zawh hnuin March aṭang khan football zinkawng pangngai a zawh ve leh ṭan a ni.

Ram tana inkhelh pawh a la chawlhsan lo. Les Bleus tan match 91 a khel tawh a, club inelna lamah ṭha taka a khel thei a nih chuan World Cup 2026 khel tur pawhin beiseina a la nei thei ang.