Promotion - FSDL duh dan ngatin!

ISL-ah 2022-23 aṭanga promotion kalpui a ni a, I League champion apiang chu ISL khel turin an tling mai ṭhin - Punjab FC chu I League champion nih vanga ISL khel hmasa ber an ni a, Mohammedan SC-in an zui.

Punjab FC hi company ṭhangduang tak RoundGlass ta an nih avangin sum lamah harsatna an tawk lem lo a, ISL club tam tak karah budget lian pawl ni lo mah se, an talbuai lo.

Mohammedan SC an tling ve leh a, hetah hian buaina a inṭan - an season hmasa berah table mawngphah an luah a, khelmual chhung ni lo, pawn lam thlengin buaina an tawk.

Players hlawh an ba nual a, coach Andrey Chernyshov phei chu January thla khan thla thum ngawt hlawh an pek theih loh avangin a hna aṭangin a bang a, Russian coach hi ISL hruai thlengtu a ni.

Hetiang teh nuai avang hian ISL enkawltu Football Sports Development Limited (FSDL) chuan April thla khan Mohammedan SC chu Indian top flight league aṭanga petchhuahah an lo vau tawh!

Mohammedan hi January thla khan club-a sum thawhtu ber, an thawhpui Bunkerhill leh Shrachi Sports te nen an intibuai a, company pahnih hian Kolkata club an thawhpuina chu an titawp lailawk.

Hetiang tehnuaih a nih avang hian FSDL a fimkhur a, I League champion hrim hrimin ISL an khelh chu an duh tawh lo - promotion kaltlanga ISL khel tur tan ruahmanna thar an siam.

FSDL duh dan chuan, ISL khel tur club chuan ISL-in dan a neih angin, ISL khel tura club-in a neih ngai - hmun hma, sum leh pai thlenga uluk taka chhui tur niin, club chu neitu pangngai hnuaiah kum nga tal a awm tur a ni, an ti bawk. FSDL rawtna hi AIFF-in a pawm chuan I League champion apiang chu ISL khel tur an ni lo thei tihna a ni.