Tute nge ISL khel dawn?

All India Football Federation leh Sports Development Limited (FSDL) hi inrem ta tehreng pawh ni se, tuin nge ISL khel dawn tih hi tun thlengin a la chiang lo - I League champion a la chian loh vang a ni!

AIFF lamin Churchill Brothers chu champion-ah puangin, nomawi pawh an hlan thlap tawh a, mahse, champion ve thoa inngai Inter Kashi lam chu Court of Arbitration for Sport (CAS) lamah kalin, AIFF thutluknaa an lungawi loh thu an thlen.

I League season a tawp khan Inter Kashi leh Churchill Brothers ten champion an lawm ve ve. Mahse, Inter Kashi hian Namdhari laka 2-1 a an tlawm ṭumin, Namdhari hian hrem vanga inlan thei lo midfielder Cledson Carvalho da Silva an chhawr tih an sawi a, point thum hmuh belh turah an inngai.

Hemi chungchang hi Inter Kashi hian CAS-ah an thlen a, thiam chantir an ni a, mahse, champion-a puan erawh an la ni lo. Inter Kashi hian season laklawhah, player pakhat Mario Barco an ziak lut a, hei hi dan phal loh a ni.

Hei vang hian Churchill Brothers leh Real Kashmir chu AIFF-ah an zualko a, Barco an chhawr avangin Inter Kashi hian point li an hloh belh a, Churchill leh Real Kashmir-in point hnih ve ve an hmuh belh thung.

AIFF thutlukna hi Inter Kashi chuan an hrethiam lo a, hei pawh hi CAS-ah an thlen. Infiamnaa thubuaite ngaihtuahtu sang ber hian Inter Kashi hi thiam a chantir leh a nih chuan I League champion an ni thei dawn - a tlai berah July 15-ah thutlukna siam a ni ang.

Thil la buaithlak ta cheu erawh, Mohammedan SC pawh lo vau ut ut tawh FSDL leh AIFF hi inrem ta se, tuna I League champion thei dinhmuna ding club pahnih hian ISL an khel lo ve ve thei tlat!

FSDL duh danah, ISL khel tur club-in FSDL duh ang takin sum leh pai an neih a ngai a, neitu ngai hnuaia kum nga tal lo awm tawh club an nih a ngai tel bawk.

Inter Kashi neitu hi RDB Group of Companies niin, anni hi international school, medical college & hospital, ciagrette, motor leh thil hrang hrang hmanga sumdawng an ni a, pawisa an ngah tawk - mahse, an club hi June 2023-ah khan din ve chauh a ni a, FSDL duh dan an tlin lo.

Churchill Brothers hi Indian club hlun ber pawl an ni a, mahse, FSDL duhdan anga ISL-a ngel nghet taka kal turin sum an ngah tawk em, tih chu zawhna awm thei a ni.

Goan club hi a neitu chu Churchill Alemao niin, sumdawng hausa leh politician lar a ni a, Goa Chief Minister pawh a lo ni ve zuai tawh a, MP leh MLA pawh a lo ni fo tawh. Churchill Brothers hi a fanu, Valanka Alemao chuan CEO niin a enkawl mek.

Churchill Alemao te chhungkua hian sum an ngah tawk ang tih a chiang a, chutihrual chuan ISL club-te hian season khatah vaibelchhe 15 chuang fe hlawh atan ringawtte an seng ṭhin - a harsa dawn.

I League champion hi chingfel ta vat pawh ni se, ISL club awm sa 13 bak hi I League aṭangin belh a ni lo ang tih a sawi theih loh - engkim hi a chiang lo vel vek a ni ber e!