Transfer bazar a reh

Indian Super League hma hun a chiang miau lo a, transfer bazar thawm pawh a reh rih hle - tun dinhmuna ISL club zinga thawm nei deuh ber chu East Bengal an ni a, Kolkata club hi chuan player an la lut nual tawh.

Kum 29 mi defensive midfielder, Palestine international Mohammed Rashid chu Indonesian club Persebaya Surabaya aṭangin free transfer-in an la a, Brazilian midfielder Miguel Figueira chu Bangladesh club Bashundhara Kings aṭangin an la lut tawh bawk.

East Bengal hi River Plate centre back hlui Kevin Sibille leh Morocco international Hamid Ahadad te nen pawh sawi zawm an ni a, Inter Kashi aṭangin striker Edmund Lalrindika chu vaibelchhe khatin an lei fel tawh bawk - an che na hle.

FC Goa pawhin thawm chu nei ri ret ret mah se, player langsar lak an la nei lo a, Kerala Blasters, Chennaiyin, Odisha, Hyderabad te an reh ṭhiap a, Bengaluru leh Mumbai City pawhin fimkhur takin Indian football inlumlet dan an thlir mek nia sawi a ni.

Season danga che na ṭhin tak Mohun Bagan pawh an reh viau a, club player hlui Kiyan Nassiri la let turin nuai 30 an inseng dawn tih loh chu thawm an nei lo reng - tun hnaiah Abhishek Singh an la lut dawn tih a chiang bawk.

Season hmasa transfer bazar thlir chuan, tun ang hunah hian ISL club tam zawkin player langsar tak tak an la lut tawh a, tun nipuiah erawh tun thlengin transfer lian tham thleng a la awm lo.