Real Madrid an chak nuamsa

FIFA Club World Cup group stage chu khelh zawh a ni ta a, match hmasa bera Al Hilal laka chak zo lo Real Madrid chu a vawi hnih nan chakin, Red Bull Salzburg chu 3-0 in an sawp a, last 16 an lut.

Real tan Vinícius Júnior, Federico Valverde leh Gonzalo García ten goal khat ṭheuh an khung a, Salzburg-in a chhanletna tur an neih loh avangin CWC an thlah - Real-in knockout round an lut a, last 16-ah Juventus an hmachhawn ang.

Madrid khaw club tan coach thar Xabi Alonso-a'n tihdan danglam a rawn pho chhuak a, Carlo Ancelotti leh Zinedine Zidane te hman uar tak 4-3-3 hmang loin, 3-5-2 hmangin a naute a rawn rem.

Alonso hian tlarhma lama Trent Alexander-Arnold tal tam tir a duh vang niin a lang a, Arnold leh Fran Garcia te chu wing back-ah, duh thala tlarhmaa tal tura zalenna pek an ni a, midfielder Aurelien Tchouameni chu centre back pahnih Antonio Rudiger leh Dean Huijsen inkarah a tawlh hnung ṭhin.

Mahse, Real-in an pu thar 'formation thar' hnuaiah harsatna an tawk lo a, minute 40-naah Vinicius chuan amah vengtu defender pahnih tlan pelin goal hmahruai a khung - first half hun pek belhah Federico Valverde khung tur a siamsak zui.

Lincoln Financial Field, Philadelphia-a inkhel entu mipui 64,811 hmaah Salzburg an che thei lo a, hun tawp nan minute ruk chauh a awm tawh tihah Gonzalo Garcia chuan a khung belh.

Real-in 3-0 in hnehna an chang a, last 16 an lut chiang. Vini chuan, "Zawi zawiin hma kan sawn zel ang. Coach duhdanin, awlsam taka khelh nghal ngawt theih a ni lo a, hun a duh dawn. Mahse, vawiinah khan kan harsat dawn lo tih erawh kan pholang," a ti.

Group H inkhel dangah Al Hilal chuan 2-0 in Pachuca an hneh a, Simone Inzaghi naute hi Asia khawmualpui aṭanga CWC last 16 lut thei awmchhun an ni - Salem Al-Dawsari leh Marcos Leonardo ten goal khat ve ve an khung a, Mexican club Pachuca-in a chhanletna tur an nei lo.