A thiam 16 zingah Inter

Champions League final hruai thlengtu Simone Inzaghi-a'n Saudi Pro League club Al Hilal pansan mah se, Inter Milan chuan an coach ngainat em em tel loin kal an zir zel - Club World Cup last 16 an lut ve leh ta.

Inter hian nimin zing khan River Plate lakah goal hnih an khung a, Argentine club hian red card pahnih an hmu thung - a tawpah chuan 2-0 in Italian club an chak a, CWC-a a thiam 16 zingah an tel.

Lumen Field-a inkhel entu mipui 45,135 hmaah team pahnihin goal khung an harsat a, mahse, minute 66-naah River Plate centre back Lucas Martinez Quarta chuan Henrikh Mkhitaryan chu goal khungna remchang a neihah a foul avangin red card pek a ni.

Player tam zawka an khelh hnu lawkah Inter-in goal an khung zui a, kum 19 mi Francesco Esposito chuan Italian club tana a goal hmasa ber a khung - hun pek belh minute thumnaah Alessandro Bastoni chuan a belhchhah bawk.

Inter-in goal hnih an khung hnuah River Plate right back Gonzalo Montiel chu hnawhchhuah ve leh a ni a, a yellow card pahnihna a hmu - inkhelh zawh hnuah buaina tenau a chhuak a, an tlawm avangin Argentine club-in puanthuah an tel.

Group E aṭangin Inter Milan hi point sarih hmuin hmahruaitu an ni a, last 16-ah Fluminense an hmachhawn ang. Inter boss Cristian Chivu chuan, "Kan hna kan hlen ta - last 16 kan luh avangin kan lawm a ni," a ti.

Chivu chuan sawi zawmin, "First half-ah khan a harsa kan ti a, River kha an huaisenin, an fei hle. Mahse, second half-ah hma kan sawn hret a, red card khan min pui ta bawk a ni," a ti - group E inkhel dangah Monterrey chuan 4-0 in Urawa Red Diamonds an sawp a, last 16 an lut ve bawk.

Sergio Ramos khelhna Monterrey tan Germán Berterame chuan goal hnih a khung a, Nelson Deossa, leh Jesús Corona ten goal khat ve ve an khung bawk. Japanese club Urawa-in a chhanletna tur an nei lo - match thum an khelhah an tlawm vek!