Silly Point: Bad-Ingley
Hamara Desh sahuaite an tal na vek a, vice captain Rishab Pant-a'n innings pahnihah century a siam ve ve. Opener pahnih Yashavi Jaiswal leh KL Rahul bakah captain thar Shubman Gill ten century an vaw chhuak vek bawk. Innghahna lungpui nghet Jasprit Bumrah-a'n Test match vawi nga khelh turah vawi thum chauh a khel dawn a, vawi khat chu a khel ta derin wicket nga a la. Men in Blue-te che ṭha viau mah se an chak zo chuang lo!
Engtia awm thei nge?
Ni li chhung kha India hi an chungnung zawk ti ila kan sawi sual thui lo ang. A ni ngana leh tawpna ni erawh Jasprit Bumrah leh a hote ar ang an vai a, swing leh seam ball che a awm meuh lo, English opener Ben Duckett a thlipuiin a nuai a ni ber, India bowler-ten chhanna an hmu zo meuh lo a ni.
Zep thu a awm lo, India tailender-te runs an thawh chhuak meuh lo. Innings hnihah India batting line up-a hnuai lam palite runs thawhkhawm hi 9 runs chauh a ni. Tin, ball man ṭhelh a tam lutuk a, Yashavi Jaiswal a ringawt pawhin ṭum nga a dawn ṭhelh a, hetiang ang international level sangah chuan a vuak let pawh a na. India an chak loh phah.
Team combination
Jasprit Bumrah hi khawvel no. 1 fast bowler a ni na meuh mai, mahse khawl a ni bik lo a, ni satliah a hman ṭum a inherchhuak ve fo dawn. Second innings-ah a rawn inherchhuak ta ngei a, a thachhang dawl turin a ṭhiante an pen chhuak lo.
Ben Duckett a bat lai chhung phei kha chuan Test cricket aiin, ODI an khel ta zawk emaw tih mai tur a ni. Test cricket-ah chuan chak turin wicket 20 lak a ngai a, chuvang tak chuan bowler ṭha deuh pakhat leh satliah ve tak pathum 'combination' aiin, bowler ṭangrual thei leh an tihtur ti chat chat paliin an khelh hi team tan a ṭha zawk fo reng a ni.
Sardul Thakur a role hian awmzia a nei meuh lo tih a chiang a, batter ni chiah si lo, strike bowler ni bawk si lo. Test cricket-ah chuan, tikawp thei dul aiin, department khata specialist, team tana innghahna tlak player thlan zel a finthlak zia a tichiang thar leh awm e.
Quo Vadis Gill- Gambhir- BCCI?
Rohit Sharma chawlh hnua, BCCI-in Virat Kohli Test cricket lama an chawlh luih tir zui hi a hun chiah lo ka lo ti a, tun dinhmunah chuan an hmunawl hi a zau lutuk a, a zau double a ni ber e. England hi 4th Innings khel thiam ber team an ni tih a chiang bawk.
Nikum tawpah khan mikhual New Zealand-in an mualpho tawh a, Australia lakah Krismas leh Kumthar lungchhiattthlak an hmang tawh bawk. Tunah England lakah a lungthu kim nan vun ngo ho hi keini Indian ho aiin an chungnung zawk tih khawvel hriata puanzar tum anga an khawsa zel a nih chuan, Gautam Gambhir-a India team enkawl zinkawng hi a rei hauh lo ang. Time bomb chungah Gambhir a hi a ṭhu a ni ber tawh e.
