Mizo pahnihin BAI coaching certificate nei thar

Mizoram badminton-in khelmual chhung ni lo, a pawn lamah pawh hmasawnna hmuh tur an nei zel a, Lalruatpuia leh Lalruatsanga te chuan Badminton Association of India (BAI) hnuaiah coaching certificate an nei thar.

BAI hian June 14-22 inkar khan Coaches Development Programme (Grassroot) 2025 a buatsaih a, Ranchi, Chhattisgarh leh National Centre of Excellence, Guwahati-a buatsaih programme-ah hian Ruatpuia leh Ruatsanga te hi an tel.

Mizo coach pahnih hi Mizoram aiawha kal niin, state tina badminton association aiawhin pahnih ṭheuh an kal. Programme hi uluk taka kalpui niin, an grade tihchianna tur examination neih a ni bawk.

Mizoram Badminton Association (MBA) aiawha kal, Mizo coach pahnihte hi grade A-ah ve ve an pass a, grade A hmu chinte hian BAI-in a buatsaih Coaching Certificate Level-1 an kal leh thei dawn a ni.

Sihphir tlangval Lalruatpuia hi Pullela Gopichand Badminton Academy (PGBA), Hyderabad-ah coach niin a thawk mek a, Chanmari West tlangval Lalruatsanga hi Ramhlun Grassroot-ah coach a ni mek thung.

MBA chuan thuchhuah siamin, "BAI-in a buatsaih coaching programme-a certificate nei thei mi tlemte zingah Mizo tlangval pahnih, Ruatpuia leh Ruatsanga te an tel thei hi MBA chuan lawmawm a tiin, a chhuang tak zet a ni," an ti.