Santos-ah Neymar cham dawn

Brazil captain Neymar chuan Santos tana khelh chhunzawm zel turin contract thar a ziak a, hetihrual hian a contract erawh December thla thleng atan chauh a ni.

Kum 33 mi forward hian January khan Saudi Pro League club Al Hilal-a a contract titawpin, thla ruk chhung atan Santos hi a zawm a, thla ruk dang khelh chhunzawm turin contract a ziak leh ta.

Neymar hi Europe lamah kir leh tur anga sawi thawm a awm a, mahse, Santos-ah a cham ta zawk dawn. Barcelona forward hlui chuan, "Lungsi takin thutlukna ka siam a ni.

"Santos hi ka team a ni mai lo a, ka in, ka chawr chhuahna, ka nun zawng zawng innghahna leh engkim ka tawnna hmun a ni. He club-ah hian naupang aṭangin puitling ka ni a, hmangaih ka ni a, ka nihna ang takin ka awm thei," a ti.

Neymar chuan sawi zawmin, "Ka career-a ka tihhlawhtlin loh tam takte he hmunah hian tihhlawhtlin ka duh a, engmahin min dang thei thei lo ang. Ka chhuak a, ka lo kir a, ka cham dawn ta - he club hi engkim inṭanna, engmah a tawp lohna tur chu a ni," a ti a, a ṭawng tui hle!

Santos president Marcelo Teixeira chuan, "Brazilian football tana ni chhinchhiah tlak a ni a, Santos FC fan-te tana kan thilpek chu hei hi a ni. Kan ngaihsan, kan nau, kan fapa rangkachak, number 10 hatu chu a cham dawn e.

"Club indinthar mekna kawngah Neymar cham tur hi thil pawimawh tak a ni a, khelmual chhung leh pawnah ani hi kan mamawh a ni. 'Ka kal a, ka lo kir a, ka cham hlen dawn ta' tih hi, a level sang bera Santos kan dah lehna tura kan thupui a ni," a ti.

Santos hi Brazilian Serie A khelh mekah, table-ah 15-na an ni mek a, relegation zone-a awm chin Internacional nen an point hmuh zat a inang.

Neymar hi Santos a kir hnuah match 14 khelin goal thum a khung tawh a, assist vawi thum a nei tawh bawk. A chawr chhuahna club tana a match khelh tawh zawng zawng zat hi 237 niin, goal 139 a khungsak a, assist 69 a nei bawk.