Chelsea tan Delap a 'che'

Club World Cup-ah Chelsea pawhin last 16 an lut - group stage-a an match hnuhnung berah ES Tunis chu 3-0 in an sawp a, Tosin Adarabioyo, Liam Delap leh Tyrique George ten goal khat ṭheuh an khung.

Blues hian first half hun pek belhah goal hnih an khung - Adarabioyo chuan Enzo Fernandez-a freekick aṭanga ball kal chu a tauh lut a, minute hnih hnuah Delap hian a belhchhah.

Kum 22 mi Delap hian tun thlatir khan Ipswich Town aṭangin Chelsea hi a zawm a, season hmasa khan Ipswich tan match 40-ah goal 12 khungin, assist vawi hnih a nei a, a man hi pound maktaduai 30 a ni.

Mi tam takin English striker chungah rinna nghah an harsat a, mahse, Delap hian Chelsea-in £30mtd laia an ngam chhan pholangin, Club World Cup-ah match thum khelin, goal khat leh assist vawi khat a nei tawh.

Blues tan Tyrique George chuan a tawp kharin, an goal thumna a khung a, coach Enzo Maresca-a'n forward Cole Palmer, Pedro Neto leh midfielder Moises Caicedo te chawlh hahdamtir chungin a naute a chakpui a, last 16-ah Benfica an tum ang.

Group D inkhel dangah Los Angeles FC leh Flamengo te 1-1 in an inhnehtawk - minute 84-naah Denis Bouanga chuan LAFC tan goal hmahruai a khung a, an chak mai dawn niin a lang hman.

Mahse, minute hnih hnu lawkah Wallace Yan chuan Brazilian club tan si phurh a sut a, group D hmahruaitu ni chungin last 16 an lut.