Inkhelh chawlhsan ka rilruk hman - Stones

John Stones chuan season hmasa khan hliam vangin hun hrehawm tak a hmang tih a sawi a, a rilru a hah zual chang phei chuan inkhelh chawlhsan maite a rilruk ṭhin thu a sawi.

Manchester City defender Stones hi season hmasa khan malpui leh ke phah hliam vangin vawi li ngawt a buai a, hliam vanga match a khelh theih loh zat chu 33 a tling hial - February hnu lamah a la inkhel leh lo.

Premier League bikah season hmasa khan match 18 a khel a, heng zinga pahnihah chiah hian a bul ṭantu zingah a tel. Stones chuan, "A nihna takah chuan ka lungngai a, hrehawm tiin ka indawm kun ṭhin.

"Hliam nei lo turin theihtawp ka chhuah a, ka fimkhur em em ṭhin bawk. Mahse, harsatna a lo thlen hi a mal mal ni loin, a hlawmin a lo thleng ṭhin emaw tih mai tur a ni, a indawt zut mai ṭhin a ni.

"Engtikah nge ka inkhelh leh theih ang tih ngaihtuah reng reng khan hun ka hmang ṭhin a, inkhel leh tawh lo tura chawlh thu puan daih mai duh chang pawh ka nei, a nihna takah chuan a harsa ve a ni," tiin a sawi.

Kum 31 mi Stones hi a hliam enkawl dam a ni tawh a, season tharah chuan bul a ṭan theih a rinawm. World World Cup khel tur pawhin training pangngai a zawm a, hun rei tak inkhel tur erawhin a la inpeih chiah lo thung.

Season hmasa khan Stones bakah hian Man City defender dang - Manuel Akanji leh Nathan Ake te chu hliam vangin an buai bawk a, an tlarhnung phui lo hi season an hman ṭhat loh chhan lian tak a ni.

Stones chuan, "Hun rei tak inkhelh mumal loh chuan ka hma hun min zawttu pawh an tam. Pep Guardiola nen kan inbia a, kei chuan Etihad Stadium chhuahsan loa cham zel ka duh, team tan hian theihtawp chhuahin ka bei leh dawn," tiin a sawi.