Zverev hnehtu Medvedev

Alexander Zverev tan dunthusam ram a thleng dik thei rih lo a ni ber mai - Inrinni zan khan Halle Open semifinal-ah Zverev hi Daniil Medvedev nen an intawng a, Russian tlangval Medvedev zawkin hnehna a chang.

OWL Arena-a inkhelah, seeded pahnihna Zverev hi tualchhung mi a nih avangin ṭantu an tam a, a chet fuh laiin thawm pawh a ring zual thei hle. Mahse, darkar thum vel an inkhelh hnuah Medvedev-a'n 7-6(3), 6-7(3), 6-4 in hnehna a chang a ni.

Kum 29 mi Medvedev hian Zverev lakah vawi 13 ngawt mai hnehna a chang tawh a, ṭum 20 an inkhelh tawhah Zverev hi vawi sarih a chak ve tawh thung a, player ṭha pahnih intawn tawhnaah Medvedev a chungnung fal angreng hle.

Russian star Medvedev chuan, "Khatiang taka ṭha khan ka khel thei ang tih pawh ka ring ngam lo zawk hial. Player ṭha tak lakah duh ang taka kan khel thei a nih chuan lawm tur a ni, hetianga chhunzawm theih pawh hi ka duh," tiin a sawi.

Seeded pathumna Medvedev leh Alexander Bublik ten nizan khan final an khel zui a, result erawh kan hre hman lo. Wimbledon inbuatsaihna a nih avangin nomawi tluk zetin grass court-a khelh ṭhat a pawimawh.