Botafogo, Atletico leh PSG?

FIFA Club World Cup group B-ah European champion Paris Saint-Germain meuh pawh tla thei dinhmunah an ding. PSG hian zanin dar 12:30 hian Lumen Field, Seattle-ah khawtual club Seattle Sounders FC nen an inkhel dawn a, Rose Bowl-ah Atletico Madrid leh Botafogo te an inkhel thung dawn.

Brazilian club Botafogo-in match hmasa bera Seattle Sounders an hneh hnuin PSG an hneh a, table chung berah an awm. Botafogo hian match hnihah point ruk hmu mah se zanina Atletico an hneh lo a nih chuan la tla thei an ni.

PSG pawhin Atletico 4-0 ngawta sawpin bul ṭan mah se Botafogo an hneh loh avangin Seattle Sounders an hneh ngei a ṭul. Luis Enrique-a hote hian Spanish club laka goal an khung tam zarah zanina an chak hrim hrim chuan an dinhmun a ṭha.

Botafogo, Atletico leh PSG ten point ruk ve hmuin group stage an khar thei a, hmunruak pahniha pakhat hi chu French club hian an hnawhkhat mai a rinawm. Brazilian club leh Atletico hian hmun ruak pakhat zawk hi an inchuh thei ang.