Kane-a hmangin Bayern-in Boca an hneh

Bayern Munich-in FIFA Club World Cup knockout stage lut turin Boca Juniors 2-1 in an hneh a, England captain Harry Kane-a'n goal hmahruai a khung bakah Michael Olise goal khung tur a siamsak.

Hard Rock Stadium-a Bayern leh Argentine club ṭha Boca Juniors inkhelin mipui a hip a, June 21, Inrinni zan inkhel hi mi 63,58 zetin an thlir. Group C inkhel danga Benfica leh Auckland City te inkhel erawhin entu 6,730 chauh an nei a, Portuguese club hi 6-0 in an chak.

Bayern-in inkhel bul a ṭan ṭha a, minute 18-na lekah Kingsley Coman-a'n Kane-a lamah ball tiperin, England captain hian ṭha zetin a pet goal. German club an chungnung zawk a, mah se Boca Juniors an duai bik lo.

Argentine club hian minute 66-naah Miguel Merentiel hmangin si phurh an sut a, Vincent Kompany hote point hloh thei dinhmunah an ding. Inkhelh ṭan tirh lama a goal khung an pawm loh Olise chuan minute 84-naah Kane-a ball pek chu ṭha zetin a khung a, chakna goal a nih bakah German club-in second round an luh phah bawk.

Inkhelh banah Kane chuan, "Boca Junior ṭantute thawm a ṭha a, ka inkhelh tawhnaa boruak ṭhatna pawl tak a ni. First half-ah khan kan khel ṭha a, goal thum khung thei tur kan ni. Second half erawh a harsa a, theihtawp kan chak zarah hnehna kan chang hram," tiin a sawi.