Flamengo lakah Chelsea an mualpho

Lincoln Financial Field-ah Chelsea-in Flamengo an hmachhawn a, striker thar Liam Delap-a'n bul ṭanin Pedro Neto hmangin goal an khung hmasa zawk. Mahse, second half-ah Flamengo-in goal thumin an chhanglet a, Blues striker Nicolas Jackson hnawhchhuah a nih bawk avangin English club an tho chhuak lo; 3-1 in an tlawm.

June 20, Zirtawpni zan inkhelah Chelsea-in bul an ṭan ṭha a, Neto-a'n cool takin goalkeeper Agustin Rossi kap karah minute 13-na lekah a khung. First half-ah 1-0 in Chelsea-in hma an hruai a, chak turin an dinhmun a ṭha bawk.

Mahse, second half ṭan tirh lama thil thlengin Chelsea dinhmun ṭha tawh chu vawi leh khatah a ti chhe vek. Minute 56-naah Flamengo substitute Bruno Henrique-a'n siphurh a sut a, Chelsea-in chak duhin Jackson an luhtir ve lehnghal.

Jackson luh hnu lawkah Flamengo defender Danilo-a'n minute 65-naah a khung belh. Chelsea striker tan kum 24 pian champha a ni a, mahse a lawm dan a duhawm loh. Minute 68-naah Jackson chuan ṭul lo taka khingpui player a tlawh luih vangin hnawhchhuah a ni a, Blues tan thawhchhuah a harsa ta vek.

Minute 83-naah Flamengo substitute Wallace Yan-a'n a khung belh a, Chelsea-in an khung belh tawh lo. Brazilian club 3-1 in an chak. Group D inkhel dangah Espérance de Tunis-in Los Angeles FC chu 1-0 in an hneh a, match tawp berah Chelsea an hmachhawn dawn.

Tunisian club leh English club te hian point thum ve ve an hmu a, head to head-ah Chelsea an ṭhat hret avangin Enzo Maresca hote tan knockout stage lut turin draw a tawk thei ang.